ՀՀ նախագահ Սերժ Սարգսեան շնորհաւորական ուղերձ յղած է Մայրութեան եւ գեղեցկութեան տօնին առիթով։

«Սիրելի՛ կանայք եւ աղջիկներ,

Ջերմօրէն շնորհաւորում եմ ձեզ Մայրութեան եւ գեղեցկութեան տօնի առթիւ:

Մայրութիւնը պաշտամունքի առարկայ է եղել անյիշելի ժամանակներից: Մօր նկատմամբ սիրոյ եւ երախտագիտութեան դրսեւորումները համաշխարհային, ինչպէս նաեւ հայկական արուեստի ու մշակոյթի անբաժանելի եւ կարեւոր մասն են:

Առողջ, կիրթ եւ հայրենասէր սերնդի դաստիարակութիւնն առաջին հերթին եւ արդարացիօրէն գնահատւում է որպէս հայ մայրերի արժանիք եւ սխրանք: Այդ սխրանքի վկան էինք մենք 100 տարի առաջ, երբ հայ մայրերը աքսորի ճանապարհին, անապատի աւազների վրայ գրելով, մաշտոցեան այբուբեն էին ուսուցանում իրենց զաւակներին` հաւատալով իրենց եւ մեր փրկութեանն ու վերապրումին: Այսօր մենք մեծարում ենք մեր մայրերին. նրանք են մեր ժողովրդի յաւէրժութեան առաջին երաշխաւորը: Եւ ամենեւին էլ պատահական չէ, որ այս տարի Հայոց ցեղասպանութեան ճանաչման գործում նշանակալի աւանդ ներդրած անձանց շնորհուող` Հայաստանի Հանրապետութեան Նախագահի մրցանակին են արժանացել ցեղասպանութեան ենթարկուած հայ կանայք` ի դէմս այսօր էլ իրենց ընտանիքներին մայրութեան ջերմութիւնը պարգեւող եւ տոկունութեան օրինակ ծառայող մեր քսան վերապրած հայրենակցուհիների:

Կրկին շնորհաւորելով գարնանային գեղեցիկ տօնի առթիւ` բոլոր մայրերին մաղթում եմ ընտանեկան երջանկութիւն եւ մայրական հպարտութիւն»: