Լիբանանահայ Օգնութեան Խաչի փոքրիկները միացած են ՀՀ սփիւռքի նախարարութեան նախաձեռնութեամբ իրականացուող «Հայոց ցեղասպանութեան հետեւանքով միլիոնաւոր մանուկներ լոյս աշխարհ չեկան» խորագիրով ծրագիրին, որ նուիրուած է Հայոց ցեղասպանութեան 100-րդ տարելիցին:

Փոքրիկները լուսանկարուած են Լիբանանի Պիքֆայա քաղաքին մէջ գտնուող Հայոց ցեղասպանութեան յուշարձանին մօտ:

Կոչ կ’ուղղենք Սփիւռքի եւ Հայաստանի բոլոր դպրոցներուն, կազմակերպութիւններուն, որ անոնք նոյնպէս իրենց մասնակցութիւնը բերեն համահայկական այս ծրագիրին: Ընդամէնը պէտք է տպել համապատասխան գրութեամբ պաստառ, տալ երեխային ձեռքը եւ լուսանկարել իր բնակութեան վայրին մէջ գտնուող (եթէ հնարաւոր է) Ցեղասպանութեան յուշարձանի մօտ:

Մեր նպատակն է 1,5 միլիոն երեխաներու կողմէ բարձրացուող այս բողոքը խարան դարձնել թուրքի ճակատին:

Լուսանկարներն ամբողջութեամբ կրնաք տեսնել այս ծրագիրին համար ստեղծուած facebook-եան էջին վրայ:

Տեղեկանք- Լիբանանի Պիքֆայա քաղաքին մէջ տեղադրուած  Հայոց ցեղասպանութեան յուշարձանը կը գտնուի Կիլիկիոյ կաթողիկոսութեան հայկական վանքի տարածքին մէջ: Յուշարձանի կառուցման աշխատանքները սկսած են 1960 թուականին, բացումը կատարուած է 1965 թուականի Ապրիլ 24-ին` Հայոց ցեղասպանութեան 50-րդ տարելիցին առթիւ` ի նշան հայ ժողովուրդի վերածնունդին եւ ի երախտագիտութիւն լիբանանեան ժողովուրդին:

Յուշարձանը կառուցուած է լիբանանահայ համայնքի եւ Լիբանանի հայ առաքելական եկեղեցւոյ ջանքերով: Յուշարձանի նախագծող-ճարտարապետը Զաւէն Խտշեանն է:

Լիբանանի քաղաքացիական պատերազմի ժամանակ յուշարձանը ենթարկուած է ռմբակոծութեան եւ վնասուած է յուշարձանի ստորին մասը: 1993 թուականին յուշարձանը վերականգնած է Յովսէփ Խաչերեանը:

Պրոնզէ  յուշարձանը , ունի 5 մեթր բարձրութիւն, կը ներկայացնէ ձեռքերը դէպի երկինք յառնած կնոջ: