Հովանաւորութեամբ եւ ներկայութեամբ Բերիոյ հայոց թեմի առաջնորդ Շահան արք. Սարգիսեանի, մասնակցութեամբ Ազգային վարչութեան ներկայացուցիչներուն, քահանայից դասուն եւ հաւատացեալ ժողովուրդին, շաբաթ, 16 օգոստոս 2014-ի յետմիջօրէի ժամը 4:00-ին տեղի ունեցաւ Քեսապի Էսկիւրանի Ս. Աստուածածին եկեղեցւոյ վերաօծումը, ապա` եկեղեցւոյ խորանի սրբապատկերի օծումն ու կիրակնամուտի ժամերգութիւնը: Սրբազան հայրը իր քարոզին ընդմէջէն մխիթարական խօսքերով յուսադրեց ներկաները: Հաւատացեալ ժողովուրդը ուրախութեան եւ յոյսի արցունքներով ունկնդրեց քարոզն ու հոգեպարար արարողութիւնը: Աւարտին տեղի ունեցաւ աղի օրհնէք եւ ոչխարներու զենում: Այնուհետեւ երիտասարդները աշխատանքի լծուեցան մինչեւ առաւօտ` տօնական մթնոլորտի մէջ պատրաստելու աւանդական հերիսան:

Կիրակի, 17 օգոստոս 2014-ի առաւօտեան Ս. Աստուածածնայ վերափոխման տօնին առիթով Էսկիւրանի Ս. Աստուածածին վերաօծուած եկեղեցւոյ մէջ սուրբ եւ անմահ պատարագ մատուցեց Քեսապի հովիւ Միւռոն քհնյ. Աւետիսեան: Օրուան պատգամը փոխանցեց Բերիոյ հայոց թեմի առաջնորդ Շահան արք. Սարգիսեանը` հետեւեալ բնաբանով. «Աստուծոյ քով անկարելի բան չկայ»: Ապա տեղի ունեցաւ խաղողի եւ մատաղի օրհնութիւն, հոծ բազմութեան ներկայութեան: Սրբազան հօր պահպանիչ աղօթքով եւ «Կիլիկիա» մաղթերգով վերջ գտան Քեսապի մէջ տեղի ունեցած երկօրեայ հոգեպարար արարողութիւնները:

«Ազդակ»