Երիտասարդական Համահաւաք` Ընդդէմ Քեսապի Մէջ Թրքական Ոճրագործութեան

Երեքշաբթի` ապրիլ 15-ի առաւօտեան ժամը 11:00-ին, նախաձեռնութեամբ Սպահանի հայոց թեմի Թեմական խորհուրդին եւ կազմակերպութեամբ «Ռուբէն» երիտասարդական միութեան, երիտասարդական բողոքի համահաւաք կայացաւ Սպահան  քաղաքի Մոթահառի կեդրոնական պողոտայի վրայ գտնուող «Turkish airlines» -ի  գրասենեակին առջեւ` ի բողոք Թուրքիոյ հովանաւորութեամբ Սուրիոյ Լաթաքիա  շրջանի հայաբնակ Քեսապ քաղաքի վրայ կատարուող ռազմական գործողութիւններուն
եւ ի պաշտպանութիւն սուրիահայութեան:

Շուրջ մէկ ժամ տեւողութեամբ համահաւաքին ընթացքին դատապարտանքի վանկարկումներով ու պաստառներով` բողոքարկողներն իրենց ցասման ու զայրոյթի ձայնը միացուցին համայն հայութեան պահանջատենչ ձայնին: Համահաւաքի շարունակութեան մէջ Շահինշահրի հայ համայնքի հոգեւոր տեսուչ Տ. Անանիա վրդ. Գուճանեանն անդրադառնալով վերջերս Քեսապի մէջ տեղի ունեցածին`
կարեւոր նկատելով ընդգծեց, որ հայը յարութիւն առնող ժողովուրդ է եւ նման երիտասարդներով կանգուն  եղած է ու պէտք է յարատեւէ` ի շահ մեր ընդհանուր  գաղափարներուն ու պահանջատիրութեան, Հայր Սուրբն աւելցուց նաեւ, որ համայն հայութիւնը պիտի չի լռէ կատարուածի կապակցութեամբ եւ տէր պիտի կանգնի քեսապահայութեան ու պիտի աջակցի անոնց, Հայր Սուրբը իր խօսքը եզրափակեց` պահաջելով թուրքէն ծունկի գալ հայու առջեւ եւ ներողութիւն խնդրել կատարուածին համար:

Հայր Սուրբի խօսքին յաջորդեց օրուայ բանաձեւի ընթերցումը, ուր դատապարտելով Թուրքիոյ ոտնձգութիւնները Սուրիոյ` ի մասնաւորի Քեսապ քաղաքի նկատմամբ, ՄԱԿ-էն եւ մարդու իրաւունքները պաշտպանող միջազգային կազմակերպութիւններէն կը պահանջուէր կանխել Թուրքիոյ աջակցութիւնն ու հովանաւորութիւնը տերորիստ-ծայրայեղական խմբաւորումներու ոճրագործութիւններու իրականացման ուղղութեամբ, իսկ Իրանի պետութենէն կը խնդրուէր իր դիւանագիտական բոլոր հնարաւորութիւնները ի գործ դնել` տարածաշրջանի քրիստոնեաներու ու մուսուլմաններու խաղաղ համակեցութեան համար:

Վերջաւորութեան մասնակիցները տեղափոխուեցան Ս. Ա Վանք, ուր Հայոց Ցեղասպանութեան զոհերու յիշատակը յաւերժացնող յուշարձանին մօտ կատարուեցաւ ծաղիկներու մատուցում:  Համահաւաքին ներկայ էին նաեւ շրջանի Հայ Դատի յանձնախումբի
անդամները, Տ. Վարդան քհնյ. Աղաբաբայեանը, «Ռուբէն» երիտասարդականմիութեան եւ Նոր Ջուղայի Հայ Մ. Մ. «Արարատ»  միութեան Ուսանողական միաւորի անդամները, հայոց ազգային դպրոցներու աւագ աշակերտներն ու համայնքի անդամները:

Մանրամասները` yerkir.am կայքին մէջ:

Scroll Up