Ապրիլ 24-ի առաւօտեան, Ամերիկայի Միացեալ Նահանգներու Լոս-Անճելըս քաղաքին մէջ մահացած է ԽՍՀՄ ժող. արտիստ, մեծանուն հայ երգահան Կոնստանտին Օրբելեանը: Նշենք, որ յուլիս 29-ին Կոնստանտին Օրբելեան պիտի դառնար 86 տարեկան: Այս մասին կը տեղեկանանք Կոմպոզիտորներու միութեան կայքէն:

Կոնստանտին Օրբէլեան ծնած է 1928թ. յուլիս 29-ին, Ռուսաստանի Արմաւիր
քաղաքին մէջ: Երաժշտական ունակութիւնները ի յայտ  եկած են դեռ մանուկ հասակին: Կանուխէն յաճախած է  Պաքուի երաժշտանոցին կից  տաղանդաւոր երեխաներու համար նախատեսուած երաժշտական յատուկ դպրոցը: Ծնողները դարձած են ստալինեան բռնութիւններու զոհ, որու պատճառով անոր հեռացուցած են դպրոցէն եւ եղբայրներուն հետ տեղափոխուած է Լեռնային Ղարաբաղի փոքրիկ գիւղերէն մէկուն մէջ:

1942թ. աշխատած է ռազմական  ճազային խումբին մէջ` որպէս դաշնակահար եւ աքորտիոնահար: Որոշ ժամանակ անց, ռազմական խումբին հետ, համերգներով հադես եկած է Երեւանի մէջ, ապա` Հայաստանի էսդրատային նուագախումբին: 1945թ-էն նուագախումբին համար վերամշակած է ժողովրդական երգեր, ինչպէս նաեւ ստեղծած նոր մեղեդիներ: Առաջին գործերէն է «Օրօրոցայինը»: 1952թ. ընդունուած է Երեւանի Ռ.Մելիքեանի անուան երաժշտական ուսումնարան, որմէ ետք` Երեւանի կոմիտասի անուան պետական երաժշտանոցը: 1955թ. գրած է «Սիրտը երգում է» ֆիլմի երաժշտութիւնը: 1956թ-էն եղած է Հայաստանի էսդրատային նուագախումբի  խմբավարն ու գեղարուեստական ղեկավարը: 1957թ. դարձած է ԽՍՀՄ Կոմպոզիտորներու միութեան անդամ:

1962թ. Մոսկուայի մէջ իրականացուող ԽՍՀՄ երիտասարդ երգահաններու մրցոյթի յաղթող  ճանչցուած է: 1969թ. գրած է «Անմահութիւն» պալէն: 36 տարի գլխաւորած է Հայաստանի պետական էսդրատային նուագախումբը: Անոր յայտնի երգերը բազմաթիւ կատարողներու ներկայացմամբ արժանացած են շարք մը մրցանակներու` «Երգել, նշանակում է ապրել», «100 երջանիկ ժամեր», «Շնորհակալութիւն կեանքին», «Սէրը չի ծերանում», «Դու այն չէս, ով պէտք է ինձ», «Յիշեք» եւ այլն: 1974թ. արժանացած է ՀԽՍՀ, 1979թ.` ԽՍՀՄ ժողովրդական արուեստագէտի կոչման: 1992թ. մեկնած է ԱՄՆ եւ բնակութիւն հաստատած Սան-Ֆրանսիսկոյի մէջ: 2012թ. պարգեւատրուած է ՀՀ Պատուոյ շքանշանով: