Սբ. Մարիամ Աստուածածնայ Աւետման տօնին Ջաւախքի ընդհանուր առաջնորդական փոխանորդ Տ. Բաբգէն վրդ Սալբիյեանի անմիջական նախաձեռնութեամբ եւ օրհնութեամբ Ջաւախքի բոլոր գործող եկեղեցիներուն մէջ մատուցուեցաւ տօնական Սբ. եւ Անմահ պատարագ: Տօնական օրուան պատարագիչը Ախալքալաքի Սբ Խաչ եկեղեցւոյ մէջ Տ. Տաթեւ քահանայ Մարուքեանն էր:

Տօնի առիթով Ջաւախքի ընդհանուր առաջնորդական փոխանորդութիւնը գեղեցիկ անակնկալ մատուցեց Ախալքալաքի շրջանային հիւանդանոցի ծննդատան աշխատող կանանց եւ օրուան մայրերուն: Տ. Տաթեւ քահանայ Մարուքեան անձամբ շնորհաւորեց ծննդկաններուն եւ բժիշկներուն` նուիրելով մէկական վարդ եւ «Մանկական Աստուածաշունչ» մատեաններ:

Տէր հայրը բարձր գնահատեց ծննդատան աշախատակիցներու կատարած գործը` նշելով. «Այստեղէն կը սկսի կեանքը, եւ Դուք այն նուիրեալներն էք, որոնք արժանապատուօրէն կ’իրականացնեն իրենց գործը»:

Հայ Առաքելական Եկեղեցւոյ այս անակնկալ փոքրիկ ուշադրութիւնը ուրախութեամբ լեցուց ներկաներու սրտերը:

Տօնական օրուան աւարտին արդէն Ջաւախքի Առաջնորդարանի դահլիճին մէջ կիրակնօրեայ դպրոցի սաները կը գովերգէին հայոց մայրերը: Կիրակնօրեայ դպրոցի տնօրէն  Զարուհի Բարբառեանի շուրջ 80 սաներ գեղարուեստական յատուկ երեկոյ  կազմակերպած էին իրենց մայրերուն համար:

Ամէն տարի ապրիլ 7-ին Հայ Առաքելական Ս. եկեղեցին կը նշէ Ս. Մարիամ Աստուածածնայ Աւետման տօնը: Ամենայն Հայոց Գարեգին Բ Կաթողիկոսն այդ օրը հռչակած է որպէս մայրերու եւ մայրութեան բերկրանքին սպասող կանանց օրհնութեան օր:

Ջաւախքի ընդհանուր առաջնորդական փոխանորդութեան մամլոյ դիւան