Հարաւային Ամերիկայի Հայկական ազգային կոմիտէն վճռականօրէն կը դատապարտէ հայահոծ Քեսապի վրայ յարձակումը եւ կը մերժէ ցանկացած փորձ` շարունակելու 100 տարի առաջ Թուրքիոյ նախաձեռնած ցեղասպանութեան ծրագիրը: Ինչպէս «Արմէնփրէս»-ին հաղորդեցին Ուրուկուէյի Հայ Դատի Յանձնախումբէն, 1915 թուականին Քեսապի ամբողջ բնակչութիւնը` մօտ 5 հազար մարդ, տեղահանուած  եւ սպանուած է: «Ներկայիս ահաբեկչական խմբաւորումներու կողմէ հետապնդումները դատարկած են քաղաքը իր պատմական բնակիչներէն, եւ Քեսապի հայութեան գլխուն վերստին կախուած է ոչնչացման վտանգը: Մենք կը ցանկանք տարածաշրջանի երկիրներու ղեկավարներու, միջազգային հանրութեան եւ իրաւապաշտպան կազմակերպութիւններու ուշադրութիւնը հրաւիրել քաղաքի բնակչութեան անվտանգութիւնը ապահովելու եւ իրենց օճախները վերադառնալու հարցերուն, ինչպէս նաեւ դատապարտել սուրիական հակամարտութեան Թուրքիոյ ապակայունացնող միջամտութիւնը»,- ըսուած է հաղորդագրութեան մէջ:

Թուրք-սուրիական սահմանի մերձակայքը եւ Լաթաքիոյ հիւսիսային կողմը գտնուող հայկական հոծ բնակչութիւն ունեցող Քեսապ գիւղաքաղաքին վրայ յարձակումը սկսած է մարտ 21-ին, Թուրքիոյ սահմանի ութ կէտերէն: Տեղեկութիւններ հաղորդուած են, որ յարձակումը իրականացուցած են «Ճապհա ալ Նուսրա» եւ «Ճէյշ ալ Իսլամ» խմբաւորումները: Գիւղաքաղաքին մէջ բնակիչներ գրեթէ չեն մնացած, անոնք տեղափոխուած են առաւել ապահով վայրեր: Հայերու մեծամասնութիւնը ապաստան  գտած է Լաթաքիոյ Սուրբ Աստուածածին եկեղեցւոյ տարածքին մէջ գտնուող ազգային կառոյցներուն մէջ: Քեսապի հայաթափութիւնը համախմբած է համայն աշխարհի հայութեան ջանքերը:

ՀՀ Ազգային Ժողովի  խումբ մը պատգամաւորներ յայտարարութիւն ընդունած են վերջին օրերուն հայաշատ Քեսապ գիւղաքաղաքին մէջ տեղի ունեցող իրադարձութիւններուն վերաբերեալ` միջազգային հանրութենէն պահանջելով ՄԱԿ-ի դիտորդներ ուղարկել այնտեղ:

Քեսապի հարցով մարտ 24-ին Հաագայի մէջ յայտարարութիւն ըրած է ՀՀ Նախագահ Սերժ Սարգսեան` հայերու տեղահանութիւնը համարելով ազգային փոքրամասնութիւններու պաշտպանութեան 21-րդ դարու մեխանիզմներուն նետուած մարտահրաւէր: Մարտ 25-ին ՀՀ ԱԺ  խումբ մը պատգամաւորներ մեկնած են Սուրիա` Քեսապի իրադրութեան եւ հայութեան խնդիրներուն տեղուոյն վրայ ծանօթանալու համար:

Սուրիոյ նախագահ Պաշար Ասատը հանդիպած է Հայաստանէն ժամանած պատգամաւորներու խումբին:

armenpress.am