ՀՀ Սփիւռքի նախարարի պարտականութիւնները կատարող Բաբգէն Տէր Գրիգորեանի ուղերձը Հայոց ցեղասպանութեան զոհերու յիշատակի օրուան կապակցութեամբ

Սիրելի՛ հայրենակիցներ,

Այսօր ապրիլի 24-ն է, եւ մենք կ՛ոգեկոչենք Հայոց ցեղասպանութեան զոհերու յիշատակը: Այսօր մենք, ինչպէս եւ շատ շատերն ամբողջ աշխարհի մէջ, գլուխ կը խոնարհինք եւ կը յիշենք 104 տարի առաջ կատարուած համամարդկային ողբերգութիւնը, որ հայ ժողովուրդը կրցաւ վերապրիլ` աշխարհասփիւռ դառնալով եւ երկրագունդի ամէն անկիւնի մէջ կառուցելով իր տունը, շէնացնելով իր բնակութեան վայրը, պահպանելով ինքնութիւնը, լեզուն, կրօնը, կապը հայրենիքին հետ: Իր պատմական հայրենիքէն զրկուած հայը կրցաւ դառնալ Հայաստան պետութեան դեսպանն ամէնուր` աչքի իյնալով իր աշխատասիրութեամբ, ազնուութեամբ, նուիրուածութեամբ: Կրակէն, մոխիրներէն, արիւնէն վտարանդի հայը կրցաւ կրկին արմատ դնել ու ապրիլը դարձնել ապրելու ու յաղթելու ամիս:

Սիրելի՛ հայրենակիցներ,

Ձեզմէ շատերը Հայոց ցեղասպանութիւնը վերապրածներու շառաւիղներն են, ամէն մէկն իր ընտանիքի պատմութիւնն ու ոդիսականն ունի: Այսօր մենք կը ցանկանք սփիւռքի հետ համահայկական օրակարգ մշակել, որուն մէջ Հայոց ցեղասպանութեան միջազգային ճանաչման գործընթացն առանցքային տեղ պիտի ունենայ: Այդ գործընթացին հայկական սփիւռքի դերն անգնահատելի է:

Այսօր մեր երախտիքի խօսքը անգամ մը եւս ըսենք բոլոր այն անհատներուն ու ժողովուրդներուն, որ գրկաբաց ընդունեցին Հայոց ցեղասպանութեան գաղթական զաւակներուն: Այսօր եկէք շնորհակալ ըլլանք բոլոր անոնց, որոնք աշխարհի շատ ու շատ երկիրներու մէջ կը հասկնան մարդկութեան դէմ գործուած յանցագործութիւններու կանխարգելման կարեւորութիւնը եւ մեր կողքին են այդ պայքարին մէջ: Մենք պիտի պաշտպանենք մեր արդար դատը եւ միջազգային ատեաններու մէջ պիտի պայքարինք ինչպէս Հայոց ցեղասպանութեան ճանաչման, այնպէս ալ ցեղասպանութիւն յանցագործութեան կանխարգելման ու պատժման համար:
Այս օրը մեզի համար յատուկ խորհուրդ ունի: Այն նախ եւ առաջ մեզի կը պատգամէ միասին զարգացնել մեր պետութիւնը, քալել կողք կողքի, աջակից ու սատար ըլլալ իրար, արժանի քաղաքացի ըլլալ ու պահպանել սեփական ինքնութիւնը սփիւռքի եւ Հայաստանի մէջ: