Սեպտեմբեր 13-ին ՀՀ սփիւռքի նախարար Հրանոյշ Յակոբեան ընդունեց ֆրանսահայ մաթեմատիկոս, պատմաբան, հայագէտ, ՀՀ Գիտութիւններու ազգային ակադեմիոյ արտասահմանեան անդամ, Երեւանի պետական համալսարանի   պատուաւոր դոկտոր, Սորպոնի համալսարանի փրոֆէսոր Քլոտ-Արմէն Մութաֆեանը:

Ողջունելով հիւրը` նախարարը կարեւոր համարեց յայտնի հայագէտ պատմաբանի հայկական պատմամշակութային արժէքներու ուսումնասիրութեան ու պահպանման ուղղուած գիտական հետազօտական գործունէութիւնը: Քննարկուեցան «Հայաստան-Սփիւռք» համահայկական 6-րդ համաժողովի նպատակներուն, թեմատիկ ուղղութիւններուն եւ սպասուող արդիւնքներուն վերաբերող հարցեր:

Յայտնի հայագէտը շնորհակալութիւն յայտնեց ջերմ ընդունելութեան համար, ներկայացուց Երուսաղէմի մէջ թանգարան հիմնելու իր ծրագիրները, անդրադարձաւ Սուրբ Երկրին մէջ հայոց ներկայութեան պատմական արմատներուն, Երուսաղէմի Հայոց պատրիարքարանի հաստատման եւ ուխտագնացութեան դէպի Տէրունական վայրեր: