Փետրուար 19-ին Գերմանիոյ Միւնխեն քաղաքի Հայ հայրենակցական միութեան «Անուշ» պարախումբը մասնակցած է Միւնխենի մէջ  կայացած պալէի շրջանային 21-րդ գերմանական մրցոյթին, որուն ժամանակ պարախումբին պարուհիներէն Մելինէ Հուպախը, ժողովրդական պարերու բաժինին մէջ ներկայացնելով Սայաթ-Նովայի «Նազանի»-ին, իր տարիքային խումբին մէջ արժանացած է 2-րդ կարգի մրցանակին: Այս մասին «Հայերն այսօր»-ին կը տեղեկացնէ պարախումբի հիմնադիր, պարուսոյց եւ գեղարուեստական ղեկավար Անուշ Չախալեան:

«Հետեւելով պարախումբի` 2017 թուականի գործունէութիւնը ՀՀ սփիւռքի նախարարութեան նախաձեռնած «Դուն ի՞նչ կ’ընես Արցախի համար» համահայկական շարժման նուիրելու որոշման, այս անգամ եւս մրցոյթին ընթացքին օտարազգիներու ուշադրութիւնը հրաւիրած ենք այս ծրագիրին շուրջ. մինչ պարելը դահլիճի նախասրահին մէջ շարժման ցուցապաստառները բարձրացուցինք եւ լուսանկարուեցանք, նոյնիսկ մեզի միացաւ մրցոյթի ղեկավար Գորիննա Զեոն, որ, տեղեկանալով նախաձեռնութեան գաղափարին մասին, նշեց, որ ամբողջ աշխարհին, յատկապէս` Արցախին, խաղաղութիւն կը ցանկայ»,-ըսաւ Անոյշ Չախալեան` յոյս յայտնելով, որ 2017 թուականը համայն հայութեան համար կ’ըլլայ բազում յաղթանակներու տարի, եւ իրենց գործունէութեամբ Սփիւռքի մէջ կը շարունակեն ծառայել հայ մշակոյթին: