«Սուրիահայերը թէ՛ Սուրիոյ, թէ՛ Հայաստանի մէջ Ամերիկայի Հայ Աւետարանչական ընկերակցութեան ուշադրութեան կեդրոնին մէջ են. անոնց ցաւը մեր բոլորին ցաւն է»,-ՀՀ սփիւռքի նախարարութեան մէջ Նոյեմբեր 25-ին տեղի ունեցած Սուրիահայերու հիմնախնդիրները համակարգող միջգերատեսչական յանձնաժողովի հերթական նիստի ժամանակ ըսաւ Ամերիկայի Հայ Աւետարանչական ընկերակցութեան Հայաստանի ներկայացուցիչ Յարութ Ներսէսեան` խօսելով ընկերակցութեան կողմէ սուրիահայերու աջակցութեան ուղղուած իրականացուած ծրագիրներու  ու յետագայ ընելիքներուն մասին:

«Հայերն այսօր»-ի փոխանցմամբ` Յարութ Ներսէսեան ներկայացուցած է  սուրիահայերու հիմնախնդիրներուն օժանդակելու ուղղութեամբ ընկերակցութեան հետեւեալ մօտեցումները` աջակցիլ անոնց, որոնք կը ցանկան մնալ Սուրիոյ  մէջ եւ պահպանել հայկական համայնքը, Հայաստան տեղափոխուիլ ցանկացողներուն, առաջին օգնութիւն ցուցաբերել Հայաստան նոր եկածներուն, օգնել սուրիահայերուն բնակութիւն հաստատելու Հայաստանի մէջ:

Յարութ Ներսէսեանի խօսքէն պարզ դարձաւ, որ սուրիական պատերազմը սկսելու պահէն ընկերակցութիւնը մօտ 2.000.000 տոլարի օժանդակութիւն  ցուցաբերած է հայ համայնքին, որպէսզի կարենայ դժուարութեան մէջ գտնուող հայերուն օգնել սնունդի, ջեռուցման եւ այլ անհրաժեշտութիւնները հոգալու համար: Բժշկական եւ կրթական աջակցութեան ուղղուած ծրագիրները նոյնպէս իւրաքանչիւր ամիս  կ’իրականացնեն:

Սուրիոյ մէջ բոլոր ծրագիրները կեանքի կը կոչուին Սուրիոյ Հայ աւետարանական եկեղեցիներու խորհուրդի նախագահ, վերապատուելի Յարութիւն Սելիմեանի գլխաւորութեամբ:

Ամերիկայի Հայ Աւետարանչական ընկերակցութիւնը նեցուկ կ’ըլլայ  նաեւ Սուրիայէն Հայաստան տեղափոխուող սուրիահայերուն: Առ այսօր ընկերակցութիւնը Հայրենիք տեղափոխուելու համար օգնած է շուրջ 100 մարդու: Ընկերակցութիւնը կը հոգայ Հայաստան տեղափոխման ճանապարհածախսերը, կը դիմաւորէ օդակայանին մէջ, կ’ուղեկցի հարազատներու տուն, իսկ եթէ հարազատներ կամ բնակարաններ չեն ունենար, մինչեւ հարցի կարգաւորումը անոնց կը պահեն ընկերակցութեան ժամանակաւոր կացարաններու մէջ: Ընտանիքներուն համար բնակարան վարձակալելու եւ բնակարանի վարձը տրամադրելու հարցը նոյնպէս կը ստանձնէ ընկերակցութիւնը:

Ի դէպ, կը դիմաւորեն յատուկ ստեղծուած աշխատանքային խումբով, որուն կազմին մէջ են ՀՀ սփիւռքի նախարարութեան աշխատակիցները, «Սուրիահայերու հիմնախնդիրները համակարգող» ՀԿ-ի աշխատակից Նորա Փիլիպոսեան, հայ Աւետարանչական ընկերակցութեան Երեւանի գրասենեակի հասարակայնութեան հետ կապերու պատասխանատու Լուսինէ Օհանեան:

«Աջակցութեան ծրագիրներու ծիրէն ներս կը համագործակցինք «Սուրիահայերու հիմնախնդիրները համակարգող» ՀԿ-ի հետ: 86.000 տոլար գումարի ֆինանսական օժանդակութիւն կը տրամադրենք 288 ընտանիքի` բժշկական միջամտութիւններու, ուսման եւ  բնակարաններու վարձավճարի համար: Իսկ ընկերակցութեան  բժշկական եւ ատամնաբուժական կեդրոններէն, որուն բժիշկները Հալէպէն են,  օգտուած են շուրջ 2500 սուրիահայ ընտանիք»,- նշեց Յարութ  Ներսէսեան` մէջբերելով, որ Հայաստանի մէջ իրականացուող աջակցութեան ծրագիրներէն են խորհրդատուութիւններու կազմակերպումը, նոր հաստատուած սուրիահայերու համար ձեռներէցութեան դասընթացներու իրականացումը` ձեռներէցներու հետ հանդիպումներ կազմակերպելով, ինչպէս նաեւ` հագուստի եւ մանկական սնունդի տրամադրումը:

Աւարտին Յարութ Ներսէսեան վստահեցուց, որ պիտի շարունակեն ներկայ ընթացքը` տարբեր ծրագիրներով աջակցիլ սուրիահայերուն, ներկայիս կ’ուսումնասիրեն նաեւ սուրիահայերու հիմնախնդիրներու երկարատեւ լուծման նպատակով սոցիալական բնակարաններու ծրագիրներու իրականացման հարցը:

Աւելցնենք նաեւ, որ Ամերիկայի Հայ Աւետարանչական ընկերակցութիւնը կը համագործակցի ՀՀ սփիւռքի նախարարութեան, Երեւանի թաղապետարաններու, «Սուրիահայերու հիմնախնդիրները համակարգող» ՀԿ-ի, «Հալէպ» հայրենակցական բարեսիրական ՀԿ-ի հետ:

Գէորգ Չիչեան