ՀՀ սփիւռքի նախարարութեան եւ «Արմէնփրէս» հայկական լրատուական գործակալութեան ջանքերով Սեպտեմբեր 24-28 ՌԴ Ասթրախան եւ Վոլկոկրատ քաղաքներուն մէջ կազմա­կերպ­ուած է լուսանկարներու ցուցահանդէս` «Հայաստա՛ն, յաւերժական իմ սէ՛ր» վերտա­ռու­թեամբ` նուիրուած ՀՀ եւ ԼՂՀ անկախութեան 25-ամեայ յոբելեաններուն: «Հայերն այսօր»-ի փոխանցմամբ` ցուցահանդէսը, որ բաղկացած է  6 թեմատիկ բաժիններէ, տեղեկատ­վու­թիւն կը տրամադրէ Հայաստանի Հանրա­պե­տու­թեան ձեռքբերուﬓերուն մասին ինչպէս ար­տաքին քաղաքականութեան, այնպէս ալ տնտեսու­թեան, գիտութեան, մշակոյթի, ճարտարա­պետութեան, մարզանքի եւ զբօսաշրջութեան բնագաւառ­նե­րուն մէջ: Նախագիծի իրականացման գործին մէջ մեծ ներդրում ունին մեր գործընկերները` «Արմէն­փրէս» լրատուական գործակալութիւնը (տնօրէն Արամ Անանեան), ՌՀՄ Ասթրախանի (ղե­կավար` Ազատ Կարա­պետ­եան) եւ Վոլկո­կրատի (ղեկավար` Արթուր Մարտիրոսեան) տարա­ծաշրջանային բաժանմունքները:

Ցուցադրութիւնը մեկնարկած է Սեպտեմբեր 24-ին Ասթրախանի Երկրագիտական թանգարանի սրահին մէջ: Այցելուները, որոնց մէջ էին Ասթրախան քաղաքի եւ երկրամասի պետական պաշտօնեաներ, գիտնականներ, անուանի արուեստագէտներ, հայկական համայնքի անդամներ, մեծ հետաքրքրութեամբ դիտեցին «Անկախութեան նուաճումներ» տեսաֆիլմը, լսեցին պատմաբան Հայկ Յակոբեանի ելոյթը, այնուհետեւ, անցնելով սրահէ սրահ, ծանօթացան «Անկախութիւնը` բարձրագոյն արժէք», «Դժուարին յաղթանակ», «Ազգային հերոսները», «Կը յիշենք եւ կը պահանջենք», «Յոյսի Հայաստան», «Հաւատքի Հայաստան. ուխտագնացութիւն առաջին քրիստոնեայ երկիր» խորագիրներով ներկայացուած շուրջ 90 լուսանկարներուն:

Ներկաները ջերմ ծափողջոյններով ընդունեցին ՀՀ սփիւռքի նախարար Հ. Յակոբեանի ողջոյնի նամակը, որ ընթերցուեցաւ հայերէն եւ ռուսերէն: Սեպտեմբեր 27-28-ին ցուցահանդէսը տեղափոխուած է Վոլկոկրատ, ուր նոյնպէս ջերմ հաւանութեան  արժանացած է: 2016 թ. Հոկտեմբերին կը նախատեսուի համանման ցուցադրութիւն կազմակերպել նաեւ Գրասնոտարի մէջ: