Սեպտեմբեր 3-ին ՌԴ Գալուկայի մարզի Օպնինսկ քաղաքին մէջ  աշակերտներուն առջեւ իր դռները բացաւ «Արաքս» կիրակնօրեայ հայկական դպրոցը: Այս մասին Հայերն այսօրին կը յայտնեն ձեռնարկի կազմակերպիչները:

Հանդիսաւոր արարողութեան կը մասնակցէին դպրոցի մօտ 60 մեծ ու փոքր աշակերտներ, անոնց ծնողները, կազմակերպիչները,Գալուկա քաղաքի հայ համայնքի ներկայացուցիչները: Բացման արարողութեան սկիզբը հնչեց Հայաստանի Հանրապետութեան օրհներգը, ելոյթի խօսքով հանդէս եկան կազմակերպիչներ Կարինէ Ղուկասեան, Յովիկ Յովակիմեան, դպրոցի ուսուցչուհի Նառա Աւետիքեան, Գալուկայի համայնքի ներկայացուցիչ Մարիամ Յովհաննիսեան: Մայրական խօսքով աշակերտներուն իր ողջոյնի խօսքը յղեց Երեւանի պետական համալսարանի նախկին դասախօս, պատմաբան, ապագայ մայրիկ Նելլի Սմբատեան` ասմունքելով Սիլվա Կապուտիկեանի «Խօսք իմ որդուն» բանաստեղծութիւնը:

Ամրան ստեղծուած երգչախումբը (երաժշտական ղեկավար`  Սառա Հարթիւնեան) կատարեց Մհերի «Հայաստան» երգը, ելոյթ ունեցաւ նաեւ երգչախումբի մենակատար Եւա Ազրոյեան` կատարելով Վարդուհի Վարդանեանի «Հայաստան» երգը: Ասմունքով հանդէս եկան  խումբ մը փոքրիկներ:

Ձեռնարկի ողջ ընթացքին կը տիրէր ուրախ եւ տօնական տրամադրութիւն: Դասարանի մուտքի կարմիր ժապաւէնը կտրեցին դպրոցի ամենափոքր աշակերտներ Սուրէն Չնաւայեան եւ  Նարէ Ազրոյեան: Տօնական թխուածքը կտրեց փոքրիկ Սուրէնի մայրիկը` Ֆլորա Բաբոյեանը:

Աւարտին բոլորը դուրս եկան դպրոցի բակ եւ միասին երկինք արձակեցին եռագոյն (կարմիր, կապոյտ, նարնջագոյն) փուչիկներ` մտքի մէջ պահելով երազանքներ: