Հոկտեմբեր 18-ին ժամը 19:30-ին ՀՀ սփիւռքի նախարարութեան աջակցութեամբ «Կոմիտաս Վարդապետ» փառատօնի ծիրէն ներս Հայաստանի ամերիկեան համալսարանի դահլիճին մէջ տեղի ունեցաւ Պոլսոյ Սահակեան Դպրաց դաս երգչախումբի երեւանեան առաջին համերգը` Սեւան Ակօշեանի ղեկավարութեամբ:

Համերգի ընթացքին հնչեցին Կոմիտասի, Մակար Եկմալեանի, Արմէն Տիգրանեանի, Խաչատուր Աւետիսեանի եւ այլոց ստեղծագործութիւնները:

Վերջաւորւոթեան ողջոյնի խօսքով հանդէս եկաւ Սփիւռքի նախարարութեան աշխատակազմի ղեկավար Ֆիրդուս Զաքարեան եւ Սահակեանցիներուն յանձնեց «Կոմիտաս Վարդապետ» փառատօնի մասնակցութեան հաւաստագիրը:

Երգչախումը կը տօնէ իր 310 ամեակը: Պոլսոյ Սուրբ Գէորգ եկեղեցւոյ Սահակեան Դպրաց դասի մանկական երգչախումբին մէջ կ’երգեն 80 մանուկներ, իսկ աւագներու խումբին 70 երիտասարդ պոլսահայեր, որոնք հայ համայնքի մշակութային կեանքին մէջ կարեւոր դերակատարութիւն ունին: Սահակեանցիները կը մասնակցին նաեւ միջեկեղեցական եւ միջազգային մրցոյթներու` բարձր պահելով պոլսահայ համայնքի պատիւը: