Յուլիս 28-ին ՀՀ Անկախութեան 25-ամեակին նուիրուած Սփիւռքի նախարարութեան «Իմ Հայաստան» համահայկական 3-րդ փառատօնի «Պարարուեստի օրեր»-ու ծիրէն ներս Սփիւռքէն ժամանած պարախումբերը ելոյթ ունեցան Արարատ քաղաքին մէջ:

Արարատ քաղաքի ամֆիթատրոնին մէջ ազգային պարերու կատարումներով հանդէս եկան «Գարուն» (ՌԴ, Սթաւրոփոլ), «Նայիրի» (Արժանթին, Պուէնոս Այրէս), «Մեղրի» (ԱՄՆ, Ֆիլատելֆիա), «Նիքա տանս» (Ուքրանիա, Տնեփրոփետրովսկ), «Տայք» (Էսթոնիա, Թալին), «Անի» (Ապխազիա, Կակրա) եւ «Էրեբունի» (Պելառուս, Մինսք) պարախումբերը:

«Իմ Հայաստան» համահայկական 3-րդ փառատօնի մասնակիցներուն ողջոյնի խօսք յղած էր Արարատ քաղաքային համայնքի ղեկավար Հայկ Հայկեան, որ ընթերցեց Արարատի քաղաքապետարանի աշխատակազմի ղեկավար Կարէն Մելքոնեան:

«Շնորհակալութիւն Ձե՛զ, յարգելի հայրենակիցներ, որ Դուք աշխարհի որ անկիւնին մէջ ալ ապրիք, մեր ազգային մշակոյթը, մեր մարտական խրոխտ պարերը, ազգային երանգն ու տարազը կը պահէք անաղարտ, հայրենանուէր մեծ աշխատանք կը կատարէք Սփիւռքի մեր երիտասարդներուն հայեցի դաստիարակելու եւ անոնց մօտ հայու աննկուն մարտական ոգին միշտ կայտառ պահելու համար:

Արարատը լաւ աւանդոյթ ունի նաեւ «Արի տուն» ծրագիրով Սփիւռքի երեխաներուն հիւրընկալելու գործին մէջ: Ամէն տարի մեր բնակիչները սիրով կ’ընդունին տասնեակ սփիւռքահայ երեխաներ, որոնք կարճ ժամկէտի մէջ կը մերուին հիւրընկալող ընտանիքին հետ: Սէրն ու գուրգուրանքը անոնց նկատմամբ միշտ  անպակաս  կ’ըլլայ:

Այդ ծրագիրի իրականացման շնորհիւ մեր շատ ընտանիքներ ջերմ բարեկամական ու մշտական  կապեր  հաստատած են սփիւռքի  ընտանիքներուն հետ:

Յարգելի հայրենակիցներ, մենք` հայաստանաբնակներս, շնորհակալ ենք, որ Դուք կաք, ապրելով ու արարելով աշխարհի տարբեր ծագերու մէջ, կարիքը յառաջանալուն Ձեր աջակցութիւնը կը ցուցաբերէք Մայր հայրենիքին:

Բարի գալուստ Արարատ քաղաք:

Կը ցանկամ, որ Դուք տուն վերադառնալուն, Ձեզի հետ տանիք ոչ միայն մեր կիզիչ արեւի ջերմութիւնը, այլեւ ատկէ ոչ պակաս նաեւ մեր` արարատցիներուս, սրտի ջերմութիւնը»,- «Հայերն այսօր»-ի փոխանցմամբ` ըսուած էր Հայկ Հայկեանի ուղերձին մէջ:

Համերգային ծրագիրին ընթացքին ելոյթ ունեցան նաեւ Արարատի «Նայիրի» (գեղ. ղեկավար` Մերի Աբրահամեան), «Արարատ» (գեղ. ղեկավար` Կարինէ Ռուբինեան) պարախումբերը:

Համերգային ծրագիրի աւարտին ՀՀ սփիւռքի նախարարութեան Մերձաւոր Սփիւռքի հետ կապերու վարչութեան գլխաւոր մասնագէտ Յասմիկ Եղիազարեան ՀՀ սփիւռքի նախարարութեան անունէն շնորհակալութիւն յայտնեց քաղաքային իշխանութեան, հանդիսատեսին` ջերմ ընդունելութեան համար եւ շնորհակալագիրներ յանձնեց Արարատ քաղաքի պարախումբերուն: