«Իմ Հայաստան» Փառատօնի Ծիրէն Ներս Հայրենիք Գտնուող Երեք Պարախումբեր Հանդէս Եկան Համերգով

Յուլիս 21-ին Համազգային հայ կրթական եւ մշակութային միութեան Հայաստանի մասնաճիւղի նախաձեռնութեամբ Յակոբ Պարոնեանի անուան թատրոնի դահլիճին մէջ տեղի ունեցաւ ՀՀ սփիւռքի նախարարութեան «Իմ Հայաստան» փառատօնի ծիրէն ներս Հայրենիք գտնուող երեք պարախումբերու համատեղ համերգը:

 Հայկական ազգային պարերու կատարումներով հանդէս եկան Համազգային հայ կրթական եւ մշակութային միութեան Ֆիլատելֆիոյ «Մեղրի» եւ Նիւ Ճըրսիի «Նայիրի» պարախումբերը (գեղարուեստական ղեկավար Գագիկ Մխիթարեան, պարուսոյց Պարգեւ Սանոսեան), Պէյրութի «Քնար» պարային համոյթը (գեղարուեստական ղեկավար Սեպուհ Անթապլեան, տնօրէն` Րաֆֆի Աֆարեան, Պարուսոյցներ` Յովհաննէս եւ Գարիկ Խաչիկեաններ):

«Մեղրի» եւ «Նայիրի» պարախումբերը իրենց համերգը նուիրեցին վաղամեռիկ պարուսոյց  Թովմաս Յարութիւնեանի յիշատակին եւ հանդէս եկան անոր բեմադրած պարերով:

Սփիւռքի նախարար Հրանոյշ Յակոբեանի ողջոյնի խօսքը փոխանցեց նախարարի տեղակալ Սերժ Սրապիոնեան: Ան բարձր գնահատեց Համազգային հայ կրթական եւ մշակութային միութեան դերակատարութիւնը Սփիւռքի հայապահպանութեան գործին մէջ, այն բացառիկ նուիրումն ու ահռելի աշխատանքը, որ կ’իրականացնէ հարուստ կենսագրութիւն ունեցող կառոյցը աշխարհի բոլոր հորիզոնականներուն մէջ: Նախարարի տեղակալը շնորհակալութիւն յայտնեց ձեռնարկի կազմակերպիչներուն, մասնակիցներուն, բոլոր այն նուիրեալներուն որունց ջանքերու շնորհիւ Սփիւռքի մէջ կը ստեղծուին ու կը գործեն նման հրաշալի խումբեր:

Նիւ Ճըրսիի «Նայիրի» պարախումբի ութամեայ կատարող, Գէորգ Չաուշի շառաւիղ  Զահրատին Սփիւռքի նախարարի տեղակալը նուիրեց հայոց բանակի զինուորի համազգեստ:

Ներկաներուն ողջունեց Համազգային հայ կրթական եւ մշակութային միութեան կեդրոնական վարչութեան ատենապետ Մկրտիչ Մկրտիչեան`  կարեւոր համարելով Հայրենիքի տարբեր բեմահարթակներու վրայ կազմակերպուող սփիւռքեան խումբերու համերգները եւ պարարուեստի դերը Սփիւռքի հայապահպանութեան գործին մէջ:

11 55011 557 11 56111 567 11 568 11 569

Scroll Up