Կլէնտելի քաղաքային խորհուրդի առաքելութեան, իրականացուցած ծրագիրներուն ու յառաջիկայ աշխատանքներուն մասին է«Հայերն այսօր»-ի հարցազրոյցը Կլէնտելի քաղաքային խորհուրդի անդամ Վարդան Ղարպետեանի հետ:

–Պարո՛ն Ղարպետեան, ի՞նչ ճանապարհ անցած էք մինչեւ Կլէնտելի քաղաքային խորհուրդի անդամ դառնալը:

– Պայքարելով  ու ամէնօրեայ աշխատանքի շնորհիւ  հասած եմ այդ պաշտօնին: Իմ ընտանիքս համայնքային կեանքին մէջ միշտ աշխոյժ  եղած է: 2003 թուականէն սկսած` ընդգրկուած եղած եմ Կլէնտելի քաղաքապետարանի տարբեր յանձնախումբերու մէջ: Ինչպէս օրինակ` ճարտարապետական յանձնախումբին, որուն որոշմամբ եւ թոյլտուութեամբ  քաղաքին մէջ որեւէ  շինութիւն կը կառուցուի: Այնուհետեւ աշխատանքներ  ծաւալած եմ պատմական շինութիւններու յանձնախումբին մէջ: Այս յանձնախումբը իրաւունք ունի արգիլելու պատմական շէնքերու քանդումը եւ փոփոխութիւններու կատարումը:

Աւելցնեմ նաեւ, որ քաղաքային խորհուրդի անդամներու ընտրութիւնները 4 տարին անգամ մը տեղի կ’ունենայ: Մինչեւ քաղաքային խորհուրդի անդամ ընտրուիլս, երեք անգամ մասնակցած եմ ընտրութիւններուն:

– Պարո՛ն Ղարպետեան, խօսինք Կլէնտելի քաղաքային խորհուրդի կազմին մէջ իրականացուող ծրագիրներուն, նախագիծերուն մասին: Այդ ամէնը  իրականացնելու` հիմնական ռազմավարութիւն ունիք:

– Հիմնական ռազմավարութիւնը այն է, որ  ամէն ջանք կը գործադրենք բոլորի կեանքի որակը բարձրացնելու համար: Ի հարկէ, այդ ամէնէն կ’օգտուին նաեւ կլէնտելահայերը:

Երբ քաղաքային խորհուրդի անդամ ընտրուեցայ, առաջինը Կլէնտելի տարեց բնակիչներու բնակարաններու վարձավճարի հարցը քննարկման դրի. բնակարաններու ամսավճարը թանկացած է, անոնք չեն կրնար վճարում կատարել: Հետամուտ ըլլալով խնդրի լուծման` հիմա արդէն անոնց համար 80 բնակարան կը կառուցուի, որոնք առաւել մատչելի գիներով  անոնց պիտի տրամադրուի:

Իսկ երիտասարդներուն համար դպրոցի բակերուն, այգիներուն մէջ ֆութպոլի դաշտեր  կը կառուցենք: Միայն ֆութպոլի դաշտեր կառուցելու նպատակով` շուրջ 10 միլիոն տոլար տրամադրեցինք: Անոնց հաճելի ժամանցը ապահովելու համար կը կառուցենք այգիներ: Կարեւոր էր նաեւ ինքնաշարժներու կանգառներու կառուցման  հարցը: Պիտի կառուցուի երեք յարմարաւէտ կանգառ, որպէսզի մարդիկ մեքենան շարելուն` խնդրի առջեւ չկանգնին:

– Հայ համայնքին համար կարեւոր ձեռքբերում է Կլէնտելի մէջ հայ–ամերիկեան թանգարանի ստեղծումը: Այդ նպատակով  ԱՄՆ Քալիֆորնիոյ նահանգապետ Ճերի Պրաունը նահանգի 2016-2017թթ. պիւտճէյէն 1 մլն տոլար յատկացուցած է կառուցման համար: Այժմ ի՞նչ ընթացքի մէջ կը գտնուին շինարարական աշխատանքները:

– Այո՛, կարեւոր եւ պատմական նշանակութիւն ունեցող իրադարձութիւն պիտի դառնայ այն Կլէնտելի հայ համայնքի կեանքին մէջ:

Հայ-ամերիկեան թանգարանի շէնքը իր մէջ պիտի ներառէ ցուցասրահներ, կրթական-մշակութային կեդրոններ, փոքրիկ թատրոն ու դասասենեակներ:

1.7 հարիւրակալ մակերեսով թանգարանը դուրսէն շրջապատուած պիտի ըլլայ գեղեցիկ պարտէզով, պիտի կանգնեցուի նաեւ Հայոց ցեղասպանութեան սրբադասուած նահատակներուն նուիրուած յուշարձան: Այն պիտի գտնուի  Կլէնտելի «Սիվիք Աուտիթորիում»-ի եւ Հանրային քոլեջի հարեւանութեամբ:

Թանգարանի կառուցման որոշումը կայացուած է 2014 թուականի Նոյեմբեր 4-ին Կլէնտելի քաղաքային խորհուրդի անդամներուն եւ ԱՄՆ Արեւմտեան շրջանի Հայոց ցեղասպանութեան 100-րդ տարելիցի ոգեկոչման յանձնախումբի միջեւ համաձայնագիրի կնքման հիման վրայ:

Նշեմ նաեւ, որ թանգարանի ընթացիկ աշխատանքները կանոնակարգելու համար ստեղծուած է յատուկ յանձնախումբ, որոնց հետ կապի մէջ կը գտնուինք: Տրամադրուած հողատարածքին համար անոնք մէկ տարի ժամանակ ունին, որպէսզի մեզի շինարարական աշխատանքներու հարցերուն հետ կապուած ճարտարապետական նախագիծեր եւ առաջարկներ ներկայացնեն:

Ատկէ յետոյ, անհրաժեշտութեան պարագային, մենք անոնց խորհուրդներով կ’օգնենք, որպէսզի ամէն ինչ լաւ ստացուի:

Յուսանք` երեք տարի յետոյ կ’ազդարարենք թանգարանի բացման ուրախալի լուրը:

– Կլէնտելի քաղաքային խորհուրդին մէջ միակ հայը Դու՞ք էք:

-Ո՛չ, երեք հայ անդամ ունի քաղաքային խորհուրդը, իսկ ընդհանուր հաշուով` հինգ հոգի են: Քաղաքապետի պաշտօնը ամէն տարի կը փոխուի: Եթէ պատմական ակնարկ կատարենք, ապա հարկ է նշել, որ մինչ այժմ Կլէնտելը հինգ հայ քաղաքապետ ունեցած է: Առաջին հայ քաղաքապետը Լարրի Զարեանը  եղած է, որուն յաջորդած են Րաֆֆի Մանուկեանը, Պոպ Եուսեֆեանը, Զարեհ Սինանեանը եւ Արա Նաճարեանը:

Յաջորդ տարի, ամենայն հաւանականութեամբ, Կլէնտելի քաղաքապետ ես կը դառնամ:

–Պարո՛ն Ղարպետեան, հե՞շտ է արդեօք Կլէնտելի քաղաքապետի պաշտօնին հասնիլ եւ մարդոց վստահութեան քուէին արժանանալ:

-Քաղաքապետին բնակիչները չեն ընտրեր:  Խորհուրդի կազմին մէջ գտնուող հինգ անդամները  կ’որոշեն, թէ իրենցմէ ով պիտի ըլլայ  քաղաքապետ: Կարելի է ըսել` այն աւելի խորհրդանշական պաշտօն է:

Իսկ քաղաքային խորհուրդի պաշտօնին ընտրուելու համար ընդամէնը ժողովուրդի վստահութեան պէտք է արժանանաս: Եթէ հասարակութիւնը  վստահի քեզի, ապա կը քուէարկէ, եթէ ոչ, ապա պէտք չէ սպասել անոր աջակցութիւնը:

Ընտրութիւններուն ազգային պատկանելիութիւնը այլեւս դեր չի խաղար, այդ շրջանը արդէն անցած է. մարդիկ շատ աւելի փորձառու եւ քաղաքականապէս հասուն դարձած են: Անոնք պարզապէս հայ  ըլլալուն  համար չեն քուէարկեր քու օգտիդ:

–Ընտրուելով Կլէնտելի քաղաքապետի պաշտօնին` ի՞նչ նոր ծրագիրներով ու գաղափարներով հանդէս պիտի  գաք:

-Քաղաքապետ ընտրուելէ յետոյ նպատակ ունիմ Կլէնտելի քաղաքապետարանի աշխատակիցներէն եւ Միացեալ կրթական խորհուրդի անդամներէն պատուիրակութիւն կազմել եւ Հայաստան բերել: Մտայղացում ունիմ, որ Կլէնտելի Ոստիկանութեան, Շտապ օգնութեան, Ճանապարհային երթեւեկութեան եւ միւս համակարգերու աշխատակիցները Հայաստան գան, ծանօթանան իրենց գործընկերներուն, տեսնեն այստեղի աշխատանքային պայմանները եւ ինչու ոչ` նաեւ փոխայցելութիւններ կատարեն` կիսուելով իրենց փորձառութեամբ:

Առհասարակ, Հայաստանի հետ գործակցելով` կրնանք տարբեր ծրագիրներ իրականացնել: Նախ սկսինք փոքր սարը բարձրանալէն, որպէսզի յետագային բարձունքի հասնինք: Ինչպէս կ’ըսեն` մեծ քար վերցնողը կը դժուարանայ այն իր ուսերէն ներքեւ դնելու:

– Արցախեան քառօրեայ պատերազմը մէկ անգամ եւս ապացուցեց հայ ժողովուրդի միասնականութիւնը:  Կլէնտելի  հայ համայնքը ի՞նչ ծրագիրներով նեցուկ եղաւ Արցախին:

– Առաջին իսկ պահէն ականջալուր եղանք Արցախեան քառօրեայ պատերազմի հետեւանքով Հայաստանի եւ Արցախի մէջ տեղի ունեցող իրադարձութիւններուն: Համայնքը անմիջապէս ոտքի կանգնեցաւ. հեռուստամարաթոններ կազմակերպեցինք, տարբեր հաշուեհամարներ եւ հիմնադրամներ բացինք, նաեւ անհատներ օգնութիւն ցուցաբերեցին:

Այդ ընթացքին մշտական կապի մէջ էինք ԼՂՀ կառավարութեան հետ` հասկնալու համար, թէ ինչ տեսակի օժանդակութիւն   անհրաժեշտ է տրամադրել: Առաջարկեցինք նաեւ մարդուժով օգնել. եղան կամաւորներ, որոնք ցանկացան Արցախ մեկնիլ: Կամաւորները այդ մասին բարձրախօսով յայտարարեցին Ապրիլ 23-ին տեղի ունեցած համահաւաքին ժամանակ:

Կ’ուզեմ` Հայաստանի մէջ վստահ ըլլան, որ սփիւռքահայերը պատրաստ են ամէն ձեւով աջակցելու Արցախին եւ Հայոց բանակին:

Ապրիլեան պատերազմը մէկ անգամ եւս հնարաւորութիւն տուաւ տեսնելու Թուրքիոյ եւ Ատրպէյճանի իրական դէմքը եւ հասկնալու անոնց նպատակները: Մէկ անգամ եւս ականատես եղանք թշնամիի դաժան քաղաքականութեան, որուն զոհ գացին եւ վիրաւորուեցան հայ խաղաղ բնակիչներ եւ քաջարի զինուորներ:

Իբրեւ հայ, հպարտութիւնս մեծ է` տեսնելով, թէ ինչպէս հայ զինուորները անպարտ ոգով Ատրպէյճանի կողմէ սանձազերծած պատերազմը յաղթեցին: Գուցէ Հայոց բանակը  հակառակորդին քանակապէս կը զիջէ, բայց որակի, պատրաստուածութեան եւ մարտունակութեան առումով, անկասկած, յառաջատար է:

Հիմա մեր տղաներուն միայն լաւ սպառազինել եւ առողջ սնունդով  անհրաժեշտ է ապահովել:

–Պարո՛ն Ղարպետեան, Հայաստանի մէջ գտնուելու օրերուն մասնակցեցաք նաեւ ՀՀ սփիւռքի նախարարութեան «Արի տուն» ծրագիրի  երրորդ փուլի բացման հանդիսաւոր արարողութեան: Կը ցանկայինք լսել Ձեր կարծիքը ծրագիրին մասին:

– Անշուշտ, գովելի է «Արի տուն» ծրագիրի  իրականացումը: Այն սփիւռքահայ երիտասարդներուն հայրենասիրութեամբ վարակելու, հայրենիքի պատմութեան, տեսարժան վայրերուն ծանօթացնելու, սեփական արմատներուն վերադառնալու մեծ ազդակ մըն է:

Կարեւոր է նաեւ այն, որ անոնք հնարաւորութիւն կ’ունենան հայկական հիւրընկալ ընտանիքի մէջ ապրելու եւ հայոց լեզուի դասընթացներուն մասնակցելու:

Աղջիկս նոյնպէս ներկայ էր «Արի տուն» ծրագիրի բացումին: Ան, տեսնելով մասնակից երեխաներու ուրախութիւնը, ոգեւորուեցաւ եւ ծրագիրին մասնակցելու ցանկութիւն յայտնեց: Գուցէ յաջորդ տարի ան նոյնպէս  «Արի տան» կանչով Հայաստան գայ:

Հարցազրոյցը` Գէորգ Չիչեանի