Թուրքիոյ վարչապետ Պինալի Եըլտըրըմը Գերմանիոյ վարչապետ Անկելա Մերքելի հետ ունեցած հեռախօսազրոյցի ընթացքին անդրադարձած է Հայոց ցեղասպանութեան ճանաչման բանաձեւի` Յունիս 2-ին Պունտեսթակւ մէջ տեղի ունենալիք քննարկումներուն ու քուէարկութեան, կը հաղորդէ ermenihaber.am-ը:

Թուրքիոյ կառավարութեան ղեկավարը իր գերմանացի պաշտօնակցին յայտնած է, որ իրենք այդ հարցով Գերմանիոյ կառավարութենէն ու Պունտեսթակէն ողջամիտ վերաբերում կ՛ակնկալեն:

Ըստ թրքական «Karar.com» լրատուակայքին` Եըլտըրըմ մասնաւորապէս ըսած է. «Թուրքիոյ կառավարութիւնը, Գերմանիոյ եւ Թուրքիոյ մէջ ապրող միլիոնաւոր թուրքերը անհանգստութեամբ կը հետեւին Գերմանիոյ խորհրդարանին մէջ անհիմն ու անիրաւ քաղաքական վճիռներ պարունակող նախաձեռնութեան: Մենք այս հարցով Գերմանիոյ կառավարութենէն ու խորհրդարանէն ողջամիտ վերաբերում կ՛ակնկալենք»։