Մայիս 30-ին ՀՀ սփիւռքի նախարարութեան մէջ հիւրընկալուեցան Ռամկավար ազատական կուսակցութեան (ՌԱԿ) վարչութեան նորընտիր անդամները: Անոնցմէ` Ճենի Գրիգորեան-Բարսեղեանի հետ զրուցած է  «Հայերն այսօր»-ի  թղթակիցը:

–Տիկի՛ն  Ճենի, ՌԱԿ-ի նորընտիր վարչութեան  կազմին մէջ Դուք առաջին եւ միակ  կինն է՞ք:

-20 տարուան մէջ ես երկրորդ կինն եմ: Արդէն 22 տարի է, որ անդամ եմ ՌԱԿ-ին: Դամասկոսէն եմ: Մինչեւ  պատերազմը ես տարբեր վարչութիւններու մէջ  աշխատած եմ` կրտսերաց, պատանեկան, իսկ վերջին տարիներուն Տիկնանց վարչութեան  ատենապետուհին էի: Պատերազմը սկսելէ յետոյ տեղափոխուեցանք այստեղ:

–Կանայք  ի՞նչ  դերակատարում ունին կուսակցութենէն ներս:

-Պիտի ըսեմ, որ կանայք մեծ թիւ կը կազմեն կուսակցութեան մէջ  եւ, հաւատացէք, որ յաճախ տղամարդոցմէ աւելի աշխոյժ են. մանաւանդ Դամասկոսի մէջ կանայք էին նիւթականը բերողը;

–Տեղեա՞կ  էք  Արցախի հետ ունեցած ծրագիրներէն:

-Կան ծրագիրներ. շատ շուտով պիտի գործադրուին:Արցախի մէջ մենք ունինք մեր գրասենեակը, որուն ատենապետը պարոն Գալստեանն է:  Մենք մշտապէս կապ ունինք Արցախի հետ,բնականաբար, կայ  աշխոյժ համագործակցութիւն:

–ՌԱԿ-էն ներս գործող Տիկնանց միութիւնը  ի՞նչ  աշխատանքներով  զբաղուած է:

-Հիմնականին մէջ` մշակութային ծրագիրներու իրականացմամբ:

–Տիկի՛ն  Ճենի, ո՞րն է  Ձեր որդեգրած  կուսակցութեան հիմնական  առաքելութիւնը:

-Հիմնականին մէջ հայապահպանութիւնն է մեր գերխնդիրը. Կ’ընենք ամէն ինչ, որպէսզի երեխաները հայ մնան, չմոռնան իրենց մայրենին, որ  ընտանիքներուն մէջ պահպանուին հայկական աւանդոյթները:

–Կը համագործակցի՞ք ՀՀ սփիւռքի նախարարութեան հետ:

-Անշու՛շտ: Սփիւռքի նախարարութեան հետ մեր կապերը շատ ամուր են. այն հայութեան հաւաքական  տունն է, ընտանիքն ու տանիքը:

Կարինէ Աւագեան