Հայաստանի, Արցախի եւ Սփիւռքի երիտասարդներու «Ապագայ» խորագիրով երկրորդ  համաժողովի մասնակիցներս, ընդգծելով համաժողովի կարեւորութիւնը եւ  կա­ռու­ցո­ղա­կան բնոյթը, կ’արձանագրենք, որ`

1. Հայաստանի, Արցախի եւ Սփիւռքի մէջ գործող հայկական երիտա­սարդական կազմակերպութիւնները կարեւոր դերակատարութիւն ունին հայա­պահ­պանութեան, հայ ինքնութեան, մայրենի լեզուի, մշակոյթի, ազգային աւանդոյթներու պահպանման, կրթամշակութային եւ մտաւոր ներուժի վերարտադրման գործին մէջ եւ այսուհետեւ պիտի շարունակեն իրենց աշ­խատանքները այս ուղղութիւններով:
2. Հայկական համայնքային երիտասարդական կազմակերպութիւններու գործու­նէու­թեան եւ անոնց ներուժի համախմբման գործընթացին մշտապէս պէտք է սատար կանգնի ՀՀ սփիւռքի նախարարութիւնը, համահայկական եւ համայնքային կառոյցները այսուհետեւ եւս պէտք է շարունակեն իրենց աջակցութիւնը երիտասարդներուն` ներկայ մարտահրաւէրներուն դիմակայելու  համար:
3. Տարբեր ոլորտներու մէջ աշխատող հայազգի աշխոյժ երիտասարդներու ներուժի համախմբումը եւ ներգրաւումը Հայաստանի Հանրապետութեան մէջ առկայ սոցիալ-տնտեսական եւ կրթամշակութային խնդիրներու լուծման գործընթացին դարձած է օրակարգային խնդիր, եւ մենք պէտք է գործնական քայլեր ձեռնարկենք  այդ  ուղղութեամբ:
4. Ներկայ պայմաններուն մէջ առանձնակի կարեւորութիւն կը ստանայ երիտասար­դական կազմակերպութիւններու գործուն աջակցութիւնը եւ մասնակցու­թիւնը համազգային խնդիրներու  լուծման.

–          Լեռնային Ղա­րաբաղի հիմնահարցի արդարացի լուծման,

–          Հայոց ցեղասպանութեան ճա­նաչման, դատապարտման­ եւ հետեւանքներու վերացման պայքարին,

–          Հայոց պետականութեան ամրապնդման,

–          Սփիւռքի մէջ ուծացման դէմ պայքարին, հայոց լեզուի իմացութեան եւ օգտագործման, հայկական պատմամշակութային արժէքներու եւ աւանդոյթներու պահպանման,

–          երիտասարդներու համագոր­ծակ­ցութեան արդիւնքով բազմապիսի ծրագիրներու իրականացման (զբօսաշրջութիւն, սպասարկման ոլորտ, գործարարութիւն, տեղեկատուական տեխնոլոգիաներ եւ այլն):

5. Համաժողովի մասնակիցներս կարեւոր կը համարենք գործող հայկական երիտասար­դական կազմակերպութիւններու աւելի աշխոյժ մասնակ­ցութիւնը ՀՀ սփիւռքի նախարարութեան կողմէ իրականացուող երիտասար­դական ծրագիրներուն եւ ձեռնարկներուն:
6. Համաժողովի մասնակիցները կը նշեն, որ նման համաժողովները մեծ խթան են Հայաստան-Արցախ-Սփիւռք կապերու, հայկական երիտասարդական կազմա­կեր­պութիւններու գործակցութեան ամրապնդման, սփիւռքեան երի­տասար­դական կազմակերպութիւններու գործունէութեան աշխուժացման համար:
7. Մենք կը հաստատենք մեր յանձնառութիւնը երկու տարին անգամ մը կամակերպելու   նման  համահայկական երիտասարդական  համաժողովներ:

Յայտարարութիւնը ընդունուած է Հայաստանի, Արցախի եւ Սփիւռքի մէջ գործող հայկական երիտասարդական կազմակերպութիւններու ղեկավարներու եւ ներկա­յացուցիչներու  երկրորդ համաժողովի մասնակիցներուն կողմէ:

  28  Նոյեմբեր 2015թ., ք Երեւան