Նոյեմբեր 20-ին ՀՀ սփիւռքի նախարար Հրանոյշ Յակոբեան Հայաստանի ազգային պատկերասրահին մէջ մասնակցեցաւ իրանահայ նկարիչ (ներկայիս լոնտոնաբնակ)  Էտման Այվազեանի ստեղծագործութիւններու ցուցահանդէսի բացման: Ցուցահանդէսը, որ կը կրէ «Հայրենի երկրի գոյները» խորագիրը, կը կազմակերպուի Հայաստանի մէջ Իրանի Իսլամական Հանրապետութեան դեսպանութեան մշակոյթի կեդրոնի եւ Հայաստանի ազգային պատկերասրահի համատեղ ջանքերով: Այն կը ներկայացնէ վաստակաշատ նկարիչի վերջին 10-15 տարիներուն ստեղծած բնանկարները, ինչպէս նաեւ ճարտարապետական եւ տիզայներական նախագիծերը:

 Ելոյթ ունենալով ցուցահանդէսի բացման` նախարար Հրանոյշ Յակոբեան մասնաւորապէս ըսաւ. «Էտման Այվազեանը սփիւռքահայ ամենանշանաւոր նկարիչներից է: Նա ծնուել եւ ստեղծագործական առաջին քայլերն արել է Իրանում, այնուհետեւ տեղափոխուելով Անգլիա եւ աւելի կատարելագործելով գիտելիքներն ու տաղանդը` նա իր ստեղծագործական գունապնակում խտացրել է հայկական, արեւելեան եւ եւրոպական մշակոյթների աւանդոյթները: Շնորհակալութիւն եմ յայտնում Հայաստանում Իրանի դեսպանութեան մշակոյթի կենտրոնին եւ Հայաստանի ազգային պատկերասրահին` այս հրաշալի ցուցահանդէսը կազմակերպելու եւ այս առիթով մեր վաստակաշատ Վարպետին Հայաստան հրաւիրելու համար»:

 Այնուհետեւ, նախարարը խօսեցաւ Էտման Այվազեանի գեղանկարչութեան արժանիքներուն մասին` վստահութիւն յայտնելով, որ անոր ստեղծագործութիւններն ընդմիշտ կը մնան հայ արուեստի գանձարանին մէջ, ապա յայտարարեց, որ հայ արուեստի զարգացման գործին մէջ ունեցած նշանակալի ներդրման համար` Էտման Այվազեան կը պարգեւատրուի ՀՀ սփիւռքի նախարարութեան «Արշիլ Գորկի» մետալով:

 Նկարիչին գնահատանքի ջերմ խօսքեր ուղղեցին ՀՀ մշակոյթի փոխնախարար Արթուր Պօղոսեան, Հայաստանի ազգային պատկերասրահի տնօրէն Արման Ծատուրեան, Հայաստանի մէջ ԻԻՀ մշակոյթի կեդրոնի տնօրէն Մաճիտ Մեշքին:

 Երախտագիտութիւն յայտնելով կազմակերպիչներուն եւ բոլոր ներկաներուն` 83-ամեայ նկարիչը անոնց հրաւիրեց դիտելու իր ստեղծագործութիւնները, որոնք լի են արեւով, սիրով, ջերմ  յիշատակներով եւ գեղեցկութեամբ: