Հայկական սփիւռքի 18 արուեստաագէտներու աշխատանքներ պիտի ներկայացուին Վենետիկի տաղաւարին մէջ: Ինչպէս կը հաղորդէ «Արմէնփրէս»­ը, վկայակոչելով The Art Newspaper պարբերականը, տաղաւարը նուիրուած կ’ըլլայ Հայոց ցեղասպանութեան 100­րդ տարելիցին: Հայկական տաղաւարը կը գտնուի Սուրբ Ղազար կղզիին մէջ, որ հայ կաթոլիկ մենաստան է եւ Մխիթարեան միաբանութեան աթոռանիստը:

«Armenity» անունը կրող տաղաւարը բաց կ’ըլլայ Մայիս 6­էն Հոկտեմբեր 18 եւ կը ներառէ փարիզաբնակ, Թուրքիոյ մէջ ծնած հայ արուեստագէտ Սարգիսի աշխատանքները, որ միաժամանակ տաղաւարին մէջ կը ներկայացնէ Թուրքիան:

Տաղաւարին մէջ ներկայացուող աշխատանքներու շարքին Սարգիս պիտի ներկայացնէ երկու աշխատանք` «Danseuse doree en haut du toit» (2012) եւ «Atlas de Mammuthus Intermedius» (2014), որոնցմէ մէկը կը պարունակէ 150 հազար տարեկան մամոնտի ոսկոր: Իսկ թրքական տաղաւարին մէջ ներկայացուող աշխատանքը
կը կրէ «Respiro» անուանումը եւ, արուեստագէտի խօսքերով, այն միտուած է հայեացք նետելու դէպի մարդասիրութիւն: