Ապրիլ  23-ի  երեկոյեան  ժամը  4.30-ին  հոծ  թիւով պաղտատահայեր հաւաքուեցան  տեղի Ս. Գրիգոր Լուսաւորիչ առաջնորդանիստ  եկեղեցի  միասնաբար  դիտելու  Մայր Աթոռ Ս. Էջմիածնին մէջ կատարուող մէկ ու կէս միլիոն հայ նահատակներու  սրբադասման  արարողութիւնը,  որ սփռուեցաւ ուղիղ եթերով: Այս մասին Պաղտատէն “Հայերն Այսօր”-ին կը գրէ Արամ Սրկ. Քէթէնճեան։

Յետ յիշեալ հոգեպարար արարողութեան, ժամը   19:15  Երեւանի  ժամանակով  կատարուեցաւ եկեղեցւոյ  զանգերու  հարիւր   ղօղանջում:  Այս արարողութեան իրենց մասնակցութիւնը բերին մեր  թեմը ներկայացնող հարիւր կղերականներ, ազգայիններ,   ուսուցիչներ,  մարզիկներ  եւ  այլ անձինք.  Իւրաքանչիւր  հնչեցնողին  ընկերացան պատանի ու պարմանուհի մը դպրոցի աշակերտութենէն եւ  սկաուտներէն:

Յիշատակութեան  արժանի  է  որ  այս ձեռնարկին  ներկայ  եղաւ  Ցեղասպանութենէն վերապրած 106 տարեկան տիկին Արաքսի Փափազեան:

Ապրիլ 24-ին Ս. Եւ անմահ պատարագ  մատուցեց թեմիս բարեխնամ առաջնորդ գեր. Տ. Աւագ արք. Ասատուրեան,ապա կատարուեցաւ  գրական- գեղարուեստական ճոխ յայտագիր,  որուն  մասնակցեցան  միութենական հաստատութիւնները,  Ազգային  վարժարանը, «Զուարթնոց»  սարկաւագած  եւ  դպրաց  դասը,Առաջնորդարանին  առընթեր  գործող  յանձնախումբերը, «Հայ  Եկեղեցասիրաց  Կազմը»  եւ  «Baghdad  Choir» դասական  նուագախումբը   ինչպէս   նաեւ դաշնակահարուհի տիկին Ն. Ալ-Րատի:

Օրուան  պատգամը  արտասանեց  թեմիս  բարեջան առաջնորդը:

Յետ  յայտագրին  բազմութիւնը  մասնակցելով  Սրբազան Հօր գլխաւորած թափորին,  ուղղուեցաւ եկեղեցիին բակը ուր  տեղի  ունեցաւ  Յուշակոթողի  բացման արարողութիւնը:

Յիշելու  ենք  որ  յուշակոթողը  գործն  է վարպետ Վարազդատ Համբարձումեանի, ով այս եւ  քանի մը  շքեղ  խաչքարեր   քանդակեց  Իրաքի  հայաշատ կեդրոններու եկեղեցիներուն մէջ տեղադրելու  համար:

Ապրիլ 23-ի  եւ 24-ի  հոգեպարար ձեռնարկներուն իրենց մասնակցութիւնը  բերին  Իրաքի  մէջ  ՀՀ  արտակարգ  եւ լիազօր  դեսպան  պարոն  Կարէն  Գրիգորեան,   ՀՀ Դեսպանութեան  կցորդ  պարոն  Ստեփան  Գէորգեան,  եւ այլ   դիւանագէտներ ու պետական պաշտօնեաներ նաեւ բարձրաստիճան  հոգեւորականներ, որոնցմէ  կը  յիշենք, Ասորեստանցիներու  նաեւ  Քաղդէացւոց  եկեղեցիներու պատրիարքները.  Հայ  կաթողիկէ,  Ասորի  ուղղափառ, Ասորի  կաթողիկէ  եւ  Ղպտի  եկեղեցւոյ  առաջնորդները ինչպէս  նաեւ  բազմաթիւ  քահանահայրեր  եւ աշխարհական  ներկայացուցիչներ:  Բոլորն  ալ ծաղկեպսակներով  յարգեցին մեր ազգի մէկ ու կէս միլիոն նահատակներուն յիշատակը: