ՀՀ սփիւռքի նախարարութեան «Արի տուն» ծրագիրի հետաքրքիր ու բովանդակալից մաս կը  կազմեն նաեւ ճամբարային օրերը, որոնք կ´անցնին Աղաւնաձորի գեղատեսիլ բնութեան գիրկին մէջ. ծրագիրի հերթական փուլերէն մէկուն ճամբարային առօրեայի վերջին` հրաժեշտի խարոյկին օրը, «Հայերն այսօր»-ի համար զրուցեցի մասնակիցներէն քանի մը հոգիի հետ, որոնցմէ մեր ընթերցողներուն ուշադրութեան կը ներկայացնենք Լիբանանէն ծրագիրին մասնակցող, շատ տպաւորիչ` Հրակ անուամբ 15-ամեայ պատանիին հետ:

–Հրա՛կ, առաջին անգամ ըլլալով Հայաստանի մէջ` կը ներկայացնէ՞ս քու տպաւորութիւններդ:

-Տպաւորութիւններս հրաշալի են. մինչ այդ շատ  լսած էի Հայաստանի մասին, Արարատ լերան, Սեւանի, բայց «Արի տուն» ծրագիրի շնորհիւ այդ ամէնը տեսայ իմ աչքերովս: Մենք մանկութենէն  միշտ կը լսենք Հայաստանի մասին, կ´ապրինք Հայրենիքի կարօտով, դպրոցին մէջ  ու տան մէջ կը  լսենք հայերէն խօսք, երգեր, Հայոց պատմութեան դրուագներ, հայերէն աղօթք: Աւելի շատ գիրքերու մէջ  կարդացած էի Հայաստանի մասին ու ֆիլմերու մէջ տեսած: Շնորհակալ եմ ծնողներուս, որոնք  քաջալերեցին ինծի, որ մասնակցիմ այս սքանչելի նախաձեռնութեան: Շատ շնորհակալ եմ այս ծրագիրին, որ ինծի ծանօթացուց իմ Հայրենիքս:

–Տեսարժան վայրերէն ո՞ւր  ամէնէն շատ  սիրեցիր:

-Բոլորն ալ տպաւորիչ էին, սակայն առաւել տպաւորիչ էր Ծիծեռնակաբերդը, որովհետեւ այն իմ նախնեաց արիւնալի ճակատագրի խորհրդանշական վկան է, յիշատակի վառ կրա՛կը  այնտեղ կը  բոցկլտայ: Այդ բարձունքէն տեսայ Երեւանի գեղեցիկ համայնապատկերը, իսկ վերեւը մաքուր, կապոյտ երկինքն էր, որն այնքա՜ն մօտ կը թուէր, տեսայ հեռուէն շողշողացող Մասիսը, յուզուեցայ, նաեւ հպարտութեան զգացում ունեցայ: Երջանիկ եմ, որ տեսայ Հայրենիքս, զգացի հայրենի տան ջերմութիւնը:

–Հրա՛կ, ո՞ր երկիրներէն եկած երեխաներուն հետ կրցար աւելի շատ ընկերութիւն ընել, շփուիլ:

-Բոլորին  հետ ալ կրցած եմ շփուիլ, սակայն աւելի շատ  Յորդանանէն եւ ՌԴ-էն եկածներուն հետ. կ´ափսոսամ, որ ռուսերէն չեմ գիտեր, որոշած եմ անպայման սորվիլ:

–Հայկական ո՞ր երգը, ո՞ր պարը   աւելի հոգեհարազատէր քեզի:

-Աւելի շատ կը սիրեմ սիրոյ թեմայով երգերը, պարերէն շատ կը սիրեմ «Քոչարի»-ն, որովհետեւ այն իր մէջ շատ կորով, հզօրութիւն ունի:

–Բնականաբար, մօրդ պատրաստած կերակուրները ամէնէն համեղն են, սակայն Հայաստան գտնուելու օրերուն դուն համտեսեցիր նաեւ ուրիշներու պատրաստած հայկական ուտելիքները. ատոնցմէ ո՞ր մէկը  ամէնէն շատ սիրեցիր:

-Այո՛, մօրս պատրաստածն ամէնէն համեղն է, սակայն այստեղ ալ լաւ կը պատրաստեն. շատ կը սիրեմ խորովածն ու քապապը, որոնք հաճոյքով ճաշակեցի իմ Հայրենիքիս մէջ: Ճաշակած եմ նաեւ Հայաստանի համեղ միրգերը, սառնորակ, անփոխարինելի ջուրը: Շնորհակալութիւ՛ն այս ծրագիրի բոլոր կազմակերպիչներուն:

  Զրուցեց Կարինէ Աւագեան