1915 թվականին Օսմանյան Թուրքիայի իրագործած 1,5 միլիոն հայերի ցեղասպանության զոհերի հիշատակին նկարահանվում է տեսահոլովակ, որի աշխատանքներին մասնակցել են համաշխարհային հռչակ ունեցող մշակութային գործիչներ: Բավական է միայն մի քանի անուն նշել. Շառլ Ազնավուր, Մոնսերատ Կաբալիե,  Արմեն Ջիգարխանյան, Պատրիկ Ֆիորի, Վլադիմիր Սպիվակով, Դմիտրի Խառատյան, Գարիկ Մարտիրոսյան, Էռնա Յուզբաշյան, Մարիամ Մերաբովա եւ այլք: Այս մասին հայտնում է Հայկական ռադիոն:

Հանրաճանաչ մարդիկ կոչ են անում դադարեցնել բռնությունը եւ կանխարգելել  ցեղասպանությունները:

«Միլիոնավոր կյանքեր» կոչվող նախագիծն իրականացվում է ՀՀ Առաջին տիկնոջ բարձր հովանավորությամբ: Երաժշտության հեղինակն է կոմպոզիտոր եւ պրոդյուսեր Կարեն Մարգարյանը, երգի բառերի հեղինակն է ամերիկյան գրող Ռիտա Մեյնը:

Տեսահոլովակում  ներկայացված է փոքրիկ աղջկա կյանքի խեղված պատմությունը, որը Թուրքիայի իրագործած ցեղասպան ոճրագործության պատճառով կորցնում է իր տունն ու ընտանիքը՝ մնալով մենակ այս մեծ աշխարհում:

Տեսահոլովակի շնոհանդեսը կկայանա ապրիլի 17-ին, ժամը 19.00-ին Մոսկվա կինոթատրոնում: Նախագծի պաշտոնական կայքէջն է www.genocidesong.com-ը: