Հարավային Ամերիկայի Հայ երիտասարդաց դաշնակցության անդամներն այցելել են Միջազգային հարաբերությունների արգենտինական խորհուրդ, որպեսզի թռուցիկներ բաժանեն 2015 թվականի Թուրքիայի արտաքին քաղաքականության թեմայով Արգենտինայում Թուրքիայի դեսպան Թաներ Գարագաշի ելույթի ժամանակ: Այս մասին գրում է «Asbarez»-ը:

«Թուրք-ադրբեջանական լոբբին շարունակում է կեղծիք տարածել եւ գրավել գիտնականների, քաղաքական գործիչների եւ լրագրողների: Մենք կրկին որոշեցինք դիմակայել թուրքական պետության ժխտմանը՝ տեղեկություններ տրամադրելով Թուրքիայի իրական արտաքին քաղաքականության մասին»,- հայտարարել են կազմակերպիչները:

Հայ երիտասարդաց դաշնակցությունը դատապարտել է այն, որ 2014 թվականին Թուրքիայում 2500 մարդ է տուժել ոստիկանության կողմից բռնության եւ հետապնդումների, ինչպես նաեւ այլ խախտումների արդյունքում:

Բացի այդ, կազմակերպությունը նշել է, որ «թուրքական կառավարությունը փակ է պահում Հայաստանի սահմանը, որպեսզի Հայաստանին ֆինանսական առումով վատ իրավիճակի մեջ դնի, քանի դեռ երկիրը չի դադարում Հայոց ցեղասպանության հարցով արդարություն պահանջել եւ պայքարել Արցախի ինքնորոշման համար»: