Ապրիլին ընդառաջ ավելի են ակտիվանում ամերիկահայ համայնքի ու կազմակերպությունների նախաձեռնած գործողությունները` նվիրված Հայոց ցեղասպանության 100-ամյա տարելիցին: Այդ ամենին փորձում են հակազդել ԱՄՆ-ի թուրքական կազմակերպությունները, գրում է ermenihaber.am-ը:

Թուրքական իշխանամետ «Սաբահ» պարբերականը ներկայացրել է վերջին շրջանում ամերիկահայերի կողմից իրականացված մի քանի կարևոր նախաձեռնությունները, ապա անդրադարձել թուրքական կողմի պատասխան գործողություններին ու դեռ իրականացվելիք միջոցառումներին:

Թերթն ուշադրություն է հրավիրել հայկական կազմակերպությունների իրականացրած «Divest Turkey» արշավին, որի արդյունքում Բերքլիի համալսարանը չեղյալ հայտարարեց Թուրքիայում նախատեսած  74 մլն դոլարանոց իր ներդրումային ծրագիրը: Նշվել է նաև հայկական համայնքի ջանքերով Կալիֆորնիայում Աթաթուրքի արձանի տեղադրման ծրագրի կասեցումը,  հոլիվուդյան հայտնի դերասան Ջորջ Քլունիիի մասնակցությամբ իրականացվող միջոցառումները և այլն:

Թուրքական կողմի պատասխան քայլերից նշվում է, այս շաբաթ սկսվող «Action Alert» ակցիան, որն իր բնույթով պատասխան է Նյու Ջերսի նահանգի խորհրդարանում երկու խորհրդարանականի կողմից ներկայացված Հայոց ցեղասպանության 100 ամյակին նվիրված բանաձևին:

Ապրիլի 24-ին ընդառաջ ԱՄՆ-ի թուրքական կազմակերպությունները թուրք բնակչությանը սոցմեդիայի միջոցով գործի անցնելու կոչեր են անում: Թուրք բնակչությանը իրազեկում են ապրիլի 24-ին Վաշինգթոնի թուրքական դեսպանատան առջև թուրքական կողմի ծրագրած հանրահավաքի մասին: Քարոզչական նպատակով շրջանառվում է #24nisandadcdeyiz հեշթեգը:

Թուրքական լոբբինգին է վերագրվում նաև վերջերս ԱՄՆ-ի սենատոր Բիլ Շուսթերի ելույթը, որով վերջինս պաշտպանում էր այն թեզը, թե Հայոց ցեղասպանության ճանաչմանն օժանդակելը հակասում է Միացյալ նահանգների շահերին: Այս շարքից է նաև նախկին կոնգրեսական Դան Բարթոնի տեղական թերթերից մեկում հրապարակված հոդվածը, որում հեղինակը քննության էր առել հայ-իրանական մերձեցումը` այն հակադրելով ԱՄՆ-ի շահերին: