Պոտսդամում տեղի ունեցավ գերմանացի գրականագետ, փիլիսոփա Ռոլֆ Հոսֆելդի «Tod in der Wüste. Der Völkermord an den Armeniern» («Մահ անապատում. Հայոց ցեղասպանությունը») գրքի շնորհանդեսը։ Այն պարունակում է պատմական կարեւոր տեղեկություններ հայերի հանդեպ Օսմանյան Թուրքիայի իշխանությունների ծրագրած անմարդկային գործողությունների մասին, որոնք տեղի ունեցան 1915-ի գարնանը և ամռանը, Armeniangenocide100.org-ի փոխանցմամբ՝ հայտնում է «Գալան»։

«Տեղի ունեցավ տեղահանություն, որի իրական նպատակն էր կոտորել հայերին անապատների ճանապարհներին»,- հեղինակը մեջբերում է Թուրքիայում Գերմանիայի դեսպանի`1915թ.-ին արտահայտած խոսքերը։ «Անապատում նրանց սպասում էր միայն մահ. տղամարդկանց, կանանց և երեխաներին։ Նրանք թույլ են տալիս, որ թուրքերն իրենց քշեն անապատ` մահանալու այրող արևից ու ծարավից»,- այդպես է արտահայտվել գերմանացի դեսպանը 1915թ.-ին հուլիսին` Բեռլին վերադառնալուց հետո։

Գրքում հեղինակը հարց է բարձրացնում` ինչպե՞ս Օսմանյան Թուրքիան կարողացավ ամբողջ աշխարհի քար լռության եւ անտարբեր հայացքի ներքո իրականացնել այդ ցեղասպանությունը, որն առ այսօր պատմական տաբու է հանդիսանում այդ երկրում։ Հաջորդ հարցն է, թե ինչ՞ը համապատասխան պայմաններ ստեղծեց իրադարձությունների զարգացման և ոճիրն իրականացնելու համար։

Նշենք, որ գրքի հեղինակը Potsdamer Lepsiushaus-ի`«Լեփսիուսի տան» գիտական ղեկավարն է: Բազմաթիվ փաստագրական գրքերի և գիտական հոդվածների հեղինակ Ռոլֆ Հոսֆելդը ծնվել է 1948 թվականին։ Իր ստեղծագործություններում անդրադառնում է մշակութային և ժամանակակից հասարակությանը հուզող պատմական երևույթներին ու հիմնախնդիրներին։ Արժանացել է տարբեր մրցանակների։ Հոսֆելդը Հայոց Ցեղասպանության փաստը հիմնավորում փաստաթղթերով, գրքեր հրատարակում, մասնակցում գիտաժողովների`տարածելով Հայոց Ցեղասպանության վերաբերյալ փաստագրական նյութեր ու տեղեկություններ:

Գրքի շնորհանդեսին բացման խոսքով հանդես է եկել Փարիզի պատմահետազոտական թանգարանի տնօրեն և Բեռլինի համալսարանի ժամանակակից պատմության պրոֆեսոր Փեթեր Շյոթլերը (Peter Schöttler):