Գերմանիայի 7 քաղաքներում՝ Բեռլին, Հաննովեր, Դորթմունդ, Քյոլն, Նյուրնբերգ, Ֆրանկֆուրտ և Մյունխեն, հայ համայնքի երիտասարդները հունվարի 17-ին միաժամանակյա ակցիա են իրականացրել՝ ի հիշատակ Հրանտ Դինքի՝ բեմադրելով թուրք ազգայնականների կողմից հայ մտավորականի սպանությունը։ Այս մասին հայտնում է Tert.am-ը:

Երիտասարդներից մեկը  մի քանի ժամ շարունակ պառկած է մնացել գետնին՝ ծածկված սպիտակ սավանով, նրա չորս կողմը կարմիր ժապավեններով առանձնացվել է, իսկ մեկ այլ հայ երիտասարդ բարձրախոսով ներկայացրել է ոչ միայն Դինքի սպանությունից մանրամասներ, այլ նաև պահանջել Գերմանիայի և Եվրոպայի ուշադրությունը Հայոց ցեղասպանության ճանաչման և դատապարտման համար։ Նաև պարզված է եղել ցուցապաստառ. «Ես սպանել եմ անհավատներին» գրությամբ։

«Մենք մի խումբ երիտասարդներ ենք ու այս ակցիայով ցանկանում ենք ամբողջ Գերմանիայի և Եվրոպայի ուշադրությունը հրավիրել 1915 թվականին տեղի ունեցած Հայոց ցեղասպանության վրա։ Մենք քրիստոնյա ենք և ցանկանում ենք, որպեսզի Գերմանիան պաշտոնապես ճանաչի Թուրքիայի կողմից իրականացված մեր նախնիների՝ հայերի, ինչպես նաև ասորիների և հույների ցեղասպանությունները»,- բարձրախոսով հայտարարել են ակցիայի մասնակիցները։

Ակցիայի մասնակիցները նշել են, որ հիշում են նաև Հրանտ Դինքին, ով սպանվել է թուրք ազգայնամոլների ձեռքով միայն նրա համար, որ անկաշկանդ խոսում էր 20-րդ դարի սկզբում տեղի ունեցած ցեղասպանության մասին։ Տեղեկացրել են, որ մինչ օրս Թուրքիային չի հաջողվում պարզել 2007թ-ին տեղի ունեցած սպանությունը՝ փոխարենը արդարացնելով 18 ամբաստանյալների։

«Պատահականությո՞ւն էր սպանությունը, թե արդեն բոլորին ծանոթ թուրքական ձեռագիր»,-հարցրել են նրանք։

Հայ երիտասարդները նաև բարձրաձայնել են Թուրքիայում մարդու իրավունքների վիճակի մասին, թե ինչպես է  այդ երկրում վտանգված մարդու իրավունքները, քանի թուրք լրագրողներ են այսօր բանտերում և հավելել, թե դա խոսում է այն մասին, որ Թուրքիայում խոսքի ազատությունը վտանգված է։

«Մենք պահանջում ենք, որպեսզի պաշտոնապես ճանաչվի Հայոց ցեղասպանությունը, դպրոցներում ուսուցանվի դրա մասին, և որ Թուրքիան փոխհատուցի, ինչպես Հոլոքոստի դեպքում էր»,-նշել են նրանք։