Օգոստոսի 20-ին ՀՀ սփյուռքի նախարար Հրանուշ Հակոբյանն ընդունեց արգենտինահայ դուդուկահար Գագիկ Գասպարյանին:

Քննարկվեցին հայապահպանության, հայ մշակույթի տարածման ու պահպանման, Հայոց ցեղասպանության 100-րդ տարելիցին նվիրված միջոցառումների կազմակերպման հետ կապված հարցեր:

Գագիկ Գասպարյանը 1997թ. մեկնել է Արգենտինա և այնտեղ ծավալել ինչպես ստեղծագործական, այնպես էլ հայապահպանությանն ուղղված գործունեություն: Նա իր իրականացրած բազում ծրագրերով ճանաչելի է դարձնում հայ մշակույթը ողջ Լատինական Ամերիկայում:

Նա համագործակցում է բոլոր հայկական կառույցների ու կազմակերպությունների հետ, ՀԲԸՄ-ի պատվավոր անդամ է:

Գագիկ Գասպարյանն առաջինն էր, որ արտերկրում իր միջոցներով կառուցեց Արցախյան ազատամարտի հերոսների հիշատակին նվիրված հուշակոթող, որի համար Արցախի Ազգային ժողովի կողմից արժանացել է հուշամեդալի:

Գագիկը ստացել է բազմաթիվ պարգևներ ու մրցանակներ Արգենտինայի պետության կողմից: Նա Արգենտինայի երաժիշտների միության անդամ է:

Գագիկ Գասպարյանը առաջին անգամ արգենտինական ֆիլմերում կիրառեց  հայկական դուդուկի երաժշտությունը:

Նա տարբեր ազգերի երաժիշտների հետ թողարկել է միասնական 50 ձայնասկավառակ և անհատական 4 ձայնասկավառակ, որոնք վաճառվում են աշխարհի շուրջ 45 երկրներում: Ձայնասկավառակներից մեկը նվիրված է Արցախյան ազատամարտի հերոսների հիշատակին, և դրա վաճառքի իրավունքը նվիրել է «Հայաստան» հիմնադրամին, որպեսզի հասույթը փոխանցվի Արցախի օգնության ծրագրերին:

Գագիկը ունի 30 օտարազգի և 2 հայ աշակերտ: Օգնում և համագործակցում է Կորդովա  քաղաքի «Գուսան» ազգային նվագարանների համույթի հետ: