Հայոց  ցեղասպանութեան  ոգեկոչման  ձեռնարկներու  ծիրէն ներս, ուրուկուահայ գաղութի երիտասարդական  միաւորներ կազմակերպեցին  արդէն աւանդութիւն դարձած «ԱՐԴԱՐՈՒԹԱՆ ՀԱՄԱՐ» ջահերով երթ։

Մայրաքաղաքիս Անկախութեան հրապարակէն մինչև քաղաքապետարանի շրջաբակը, աւելի քան չորս քմ. երթը անցաւ գլխաւոր պողոտայէն, ժամանակի մը համար կասեցնելով երթեւեկութիւնը։

Լայն պաստարներ և հայկական ու տեղական  դրօշներ  պարզած հարիւրաւոր հայորդիներ մեծ  ուշադրութեան  արարկայ դարձան, որոնց  հետ  այս տարի մասնակցեցան նաև Հրեայ համայնքի և բնիկ հնդիկներու ժառագներ, պետական ներկայացուցիչներ և առհասարակ ուրուկուայցի քաղաքացիներ։

Երիտասարդ մը կոչով ելոյթ ունեցաւ՝ շեշտելով որ մեր պայքարը պիտի շարունակուի մինչև վերջնական հատուցում և մեր պապենական հողերու վերադարձ  իրենց իրաւական տիրոջ՝ հայ ժողովուրդին։

Վերջաւորութեան, տպաւորիչ և յուզիչ էր, երբ Համազգայինի «Շիրազ» և Հայ կեդրոնի  «Գայանէ»  պարախումբերու տղաքն ու աղջիկները  հայկական Քոչարի պարի հնչիւներու տակ մեծ ոգևորութիւն ստեղծեցին։

Պաշտօնապէս յայտարարուեցաւ Ցեղասպանութեան թանգարանի հիմնարկութիւնը

Մշակութային նախարարութեան սրահի մէջ Ապրիլ 24-ի օրը, մեծ թիւով հրաւիրուած պետական և տեղացի Հասարակական կազմակերպութիւններու, ինչպէս նաև հայ գաղութի կարգ մը անդամներու դիմաց, մշակոյթի փոխ նախարար Փրոֆ. Օսգար Կոմեզ յայտարարեց Հայոց ցեղասպանութեան Թանգարանի հիմնադրամ ստեղծելու մասին, որ արդէն նախապէս խորհրդակցած էր Ուրուկուայի Հայ գաղութի միացեալ յանձնախումբի հետ, այս վերջին չորս ամիսներու ընթացքին, ուր միասնաբար կազմուեցաւ Թանգարանի վերաբերեալ կանոնագրութիւն մը։ Փրոֆ. Կոմեզ մանրամասնօրէն ներկայացնելէ ետք մինչև այսօր կատարուած աշխատանքը, ըսաւ,  թէ թանգարանի վերաբերեալ գործունէութիւնը արդէն նոր փուլ կը մտնէ և յոյս յայտնեց որ մինչև 100-աեակի Ապրիլ 24, հիմնաքարը զետեղել կառուցուելիք թանգարանին։