Հուլիսի 20-ին ՀՀ սփյուռքի նախարար Հրանուշ Հակոբյանն ընդունեց Հայաստանում բնակություն հաստատած սիրիահայ գործարարներ Հակոբ Փիլավճյանին, Մարտիրոս Պոզաքալյանին, Կարուշ Ղազելյանին, ովքեր 2005 թ. Հալեպում հիմնել են «Հայլանտ» շինարարական ընկերությունը, որն այնտեղ 11 շենք է կառուցել: 2012 թ. ընկերությունը տեղափոխվել է Երևան, որտեղ էլ ընկերության կողմից կառուցվել է բնակելի մեկ շենք:  Ընկերությունը պատրաստվում է կառուցել երկրորդ շենքը, որի առաջին հիմնաքարը հանդիսավորությամբ կտեղադրվի մոտ օրերս: Հանդիպմանը մասնակցում էր նաև Քուվեյթի Ազգային վարժարանի փոխտնօրեն, «Ազդարար» շաբաթաթերթի խմբագիր Կարո Արսլանյանը:

Ողջունելով հյուրերին՝ նախարար Հրանուշ Հակոբյանը կարևորեց սփյուռքահայ գործարարների ջանքերը՝ Հայաստանում ներդրումային ծրագրեր իրականացնելու ուղղությամբ: «Ծնունդով տարբեր տեղերից ենք, բայց բոլորս հայաստանցի ենք: Ձեր կարգախոսն է. «Հայրենիք ենք վերադարձել, տուն ենք կառուցում», – հավելեց նախարարը:

Հայրենադարձ գործարարները շնորհակալություն հայտնեցին ջերմ ընդունելության և քաջալերանքի համար: Նրանք ներկայացրին կազմակերպության ծրագրերը, հեռանկարներն ու հնարավորությունները,հրավիրեցին նախարարին՝ ներկա գտնվելու նոր շենքի հիմնարկեքին և պատրաստակամություն հայտնեցին համագործակցելու սիրիահայերի խնդիրների լուծման ուղղությամբ: