«Ծնունդով Տարբեր Տեղերէ Ենք, Բայց Բոլորս Հայաստանցի Ենք. Հրանոյշ Յակոբեան

Յուլիս 20-ին ՀՀ սփիւռքի նախարար Հրանոյշ Յակոբեան ընդունեց Հայաստանի մէջ բնակութիւն հաստատած սուրիահայ գործարարներ Յակոբ Փիլաւճեանը, Մարտիրոս Պոզաքալեանը, Կարուշ Ղազելեանը, որոնք 2005 թ. Հալէպի մէջ հիմնած են «Հայլանտ» շինարարական ընկերութիւնը, որ այնտեղ 11 շէնք  կառուցած է: 2012 թ. ընկերութիւնը տեղափոխուած է Երեւան, ուր ընկերութեան կողմէ կառուցուած է բնակելի մէկ շէնք:  Ընկերութիւնը կը պատրաստուի կառուցել երկրորդ շէնքը, որուն առաջին հիմնաքարը հանդիսաւորութեամբ կը տեղադրուի մօտ օրերս: Հանդիպման կը մասնակցէր նաեւ Քուէյթի Ազգային վարժարանի փոխտնօրէն, «Ազդարար» շաբաթաթերթի խմբագիր Կարօ Արսլանեանը:

Ողջունելով հիւրերը` նախարար Հրանոյշ Յակոբեան կարեւոր համարեց սփիւռքահայ գործարարներու ջանքերը` Հայաստանի մէջ ներդրումային ծրագիրներ իրականացնելու ուղղութեամբ: «Ծնունդով տարբեր տեղերից ենք, բայց բոլորս հայաստանցի ենք: Ձեր կարգախօսն է. «Հայրենիք ենք վերադարձել, տուն ենք կառուցում», – աւելցուց նախարարը:

Հայրենադարձ գործարարները շնորհակալութիւն յայտնեցին ջերմ ընդունելութեան եւ քաջալերանքի համար: Անոնք ներկայացուցին կազմակերպութեան ծրագիրները, հեռանկարներն ու հնարաւորութիւնները,հրաւիրեցին նախարարը` ներկայ գտնուելու նոր շէնքի հիմնարկէքին եւ պատրաստակամութիւն յայտնեցին համագործակցելու սուրիահայերու խնդիրներու լուծման ուղղութեամբ:

Scroll Up