ՀՀ սփյուռքի նախարարության նախաձեռնությամբ նոյեմբերի 29-ին  կմեկնարկի Հայաստանի Հանրապետության անկախության  25-ամյակին նվիրված «Կարդում ենք միասին» հաղորդաշարը: Այն իրականացվում է Համահայկական աշխարհագրական ասոցիացիայի հետ համագործակցությամբ և կցուցադրվի Հայաստանի Հանրային հեռուստաընկերության «Սփյուռքի ժամ» ծրագրի շրջանակներում:

«Հայերն այսօր»-ի  փոխանցմամբ՝ հաղորդաշարի նպատակն է մեծարել հայ գրականության դասականներին, խոնարհվել նրանց հիշատակի առաջ, ինչպես նաև՝ պահպանել ու տարածել նրանց ստեղծագործությունները:

Հաղորդաշարի ընթացքում հայ գրողների ստեղծագործությունները կներկայացվեն Հայաստանի, Արցախի և Սփյուռքի  համայնքների տարբեր ոլորտների ներկայացուցիչներ:

 Հաղորդաշարում արդեն նկարահանվել են Լիբանանի «Զարթոնք» օրաթերթի գլխավոր խմբագիր Սևակ Հակոբյանը, լիբանանահայ երգչուհի Շողիկ Թորոսյանը, Վենետիկի Կաֆոսկարի համալսարանի դասախոս Սոնա Հարությունյանը, Ավստրալիայի «Հայաստան-Սփյուռք»  գործակցության մարմնի կազմակերպիչ, «Հայաստան» համահայկական հիմնադրամի Ավստրալիայի մասնաճյուղի ներկայացուցիչ և Ռամկավար ազատական կուսակցության Ավստրալիայի մասնաճյուղի ղեկավար Հայկ Լեփեջյանը, Սորբոնի համալսարանի  հոգեբանության և լեզվաբանության դասախոս Հիլդա Գալֆայան-Փանոսյանը և այլք:

Հավելենք, որ հաղորդաշարը եթեր կհեռարձակվի  յուրաքանչյուր երեքշաբթի, ժամը՝ 23:40-ին, կրկնությունը՝ չորեքշաբթի՝ 08:25-ին: Անդրանիկ եթերի ընթացքում կներկայացվեն հատվածներ Գրիգոր Նարեկացու «Մատյան ողբերգության» պոեմից: