Ամփոփվել են Համազգային հայ կրթական և մշակութային միության և Երևանի թատրոնի և կինոյի պետական ինստիտուտի նախաձեռնությամբ կազմակերպված «Հայրերի հող» խորագրով կարճամետրաժ, ցածրաբյուջե ֆիլմերի մրցույթի արդյունքները: Այս մասին «Հայերն այսօր»-ին հայտնում են Համազգային հայ կրթական և մշակութային միության հայաստանյան գրասենյակից:

Մրցույթը նվիրված էր Հայաստանի Հանրապետության անկախության 25-ամյակին և նպատակ ուներ խթանել ժամանակակից հայ ֆիլմարվեստը, բացահայտել ոլորտում ստեղծագործող նոր անուններ, աջակցել ուսանող, երիտասարդ սցենարիստներին և ռեժիսորներին:

Մրցույթին ներկայացված 17 սցենարներից հեղինակավոր ժյուրին ընտրել է 3 լավագույնները, որոնց հիման վրա Համազգային հայ կրթական և մշակութային միության հովանավորությամբ նկարահանվել են  հետևյալ ֆիլմերը` 

Շողեր Պետրոսյանի «Հայրերի հող»

Վարդան Թովմասյանի «Մեր գյուղի լույսերը»

Սոնա Տոնականյանի «Գնդակը»

Ս.թ. հոկտեմբերի 7-ին`ժամը 16:00-ին, Համազգայինի Հայաստանի գրասենյակում տեղի կունենա Շողեր Պետրոսյանի «Հայրերի հող» ֆիլմի ցուցադրությունը:

«Հայրերի հող» խորագրով մրցույթի ժյուրին գլխավորում էր Հայաստանի ազգային կինոակադեմիայի նախագահ Հարություն Խաչատրյանը,  իսկ ժյուրիի կազմում ընդգրկված էին  Համազգային  հայ կրթական և մշակութային հիմնադրամի նախագահ Լիլիթ Գալստյանը, կինոգետ Անետա Երզնկյանը, Երևանի թատրոնի և կինոյի պետական ինստիտուտի ռեկտոր Դավիթ Մուրադյանը, կինոդրամատուրգ Ռուբեն Հովսեփյանը, սցենարիստ Սպարտակ Ղարաբաղցյանը, ինչպես նաև սփյուռքահայ կինոբեմադրիչ Նիկոլ Պէզճեանը: