«Երևանյան ամառ 2016» եռամսյա ծրագրով նախատեսված միջոցառումներին Երևանի քաղաքապետի հանձնարարությամբ մշտապես ներգրավված են նաև հատուկ խմբերի երեխաները: Հերթական հետաքրքիր անակնակալն ապրիլին առաջնագծում զոհված զինծառայողների 30 արցախցի երեխաների համար էր, ովքեր իրենց հարազատների հետ Երևանում էին ԼՂՀ-ում գործող «Մայրություն» ՀԿ-ի նախաձեռնությամբ իրականացվող ծրագրով: Այս մասին «Հայերն այսօրը» տեղեկանում է Երևանի քաղաքապետարանի տեղեկատվության  և հասարակայնության հետ կապերի վարչությունից:

Երևանի քաղաքապետ Տարոն Մարգարյանի աջակցությամբ երեխաների այցը մայրաքաղաք հիշարժան և ավելի հետաքրքիր դարձնելու նպատակով կազմակերպվել է այցելություն Երևանի կենդանաբանական այգի: Երեխաներից շատերն առաջին անգամ են եղել այգում, նրանք հաճույքով զբոսնել են, նստել կարուսելներ, կերակրել կենդանիներին:

Մայրաքաղաքի փոքրիկ հյուրերին ևս մեկ հաճելի ականկնալ է մատուցվել Երևանի քաղաքապետարանի կողմից. երեխաները «Երևան Սիթի Տուր» երկհարկանի ավտոբուսով ճանաչողական շրջայց են կատարել Երևանում և ծանոթացել պատմամշակութային վայրերին:

Մշակութային և ժամանցային ծրագրերով հագեցած օրվա ավարտին երեխաները նշել են, որ երևանյան այցն իրենց արձակուրդային լավագույն հիշողություններ պարգևեցին, որոնց մասին կպատմեն ընկերներին և համադասարանցիներին: