Նոյեմբերի 13-ին ՀՀ սփյուռքի նախարար Հրանուշ Հակոբյանն ընդունեց  իրավական մասնագիտությունների Հայ-ֆրանսիական ֆեդերացիայի համանախագահ, ֆրանսահայ բարերար Ռայմոն Եզեկելյանին, ում աջակցությամբ մի շարք  հայանպաստ ձեռնարկներ են իրականացվել ինչպես Ֆրանսիայում, այնպես էլ Հայաստանում:

Հյուրը մեծ գոհունակություն հայտնեց Սփյուռքի նախարարության հայապահանությանն ի նպաստ իրականացվող ծրագրերի վերաբերյալ: Նա գովեստով խոսեց մասնավորապես «Արի տուն» ծրագրի մասին, որի շնորհիվ աշխարհի տարբեր երկրներում ապրող հայ երիտասարդները հնարավորություն են ունենում ծանոթանալ  Հայաստանին, շփվել և կապեր ստեղծել միմյանց հետ:

Շնորհակալություն հատնելով հյուրին նախարարության աշխատանքները բարձր գնահատելու համար՝ նախարարը փոխադարձորեն շնորհակալություն հայտնեց Եզեկելյանին հայրենանվեր աշխատանքների և նախարարության ծրագրերին աջակցելու  համար:

Զրույցի ընթացքում շոշափվեցին նաև Հայաստան տեղափոխված սիրիահայերի վիճակին վերաբերող հարցեր:

Նախարարը մանրամասնորեն տեղեկացրեց սիրիահայությանը ցուցաբերվող պետական աջակցության, ինչպես  նաև առկա դժվարությունների մասին:

 Քննարկվեցին Հայաստան-Սփյուռք գործակցության զարգացմանն առնչվող այլ հարցեր: