Նոյեմբեր 13-ին ՀՀ սփիւռքի նախարար Հրանոյշ Յակոբեան ընդունեց  իրաւական մասնագիտութիւններու Հայ-ֆրանսական միութեան համանախագահ, ֆրանսահայ բարերար Ռայմոն Եզեկելեանը, որուն աջակցութեամբ  շարք  մը հայանպաստ ձեռնարկներ իրականացուած են ինչպէս Ֆրանսայի, այնպէս ալ Հայաստանի մէջ:

Հիւրը մեծ գոհունակութիւն յայտնեց Սփիւռքի նախարարութեան հայապահանութեան ի նպաստ իրականացուող ծրագիրներուն վերաբերեալ: Ան գովեստով խօսեցաւ մասնաւորապէս «Արի տուն» ծրագիրին մասին, որուն շնորհիւ աշխարհի տարբեր երկիրներու մէջ ապրող հայ երիտասարդները հնարաւորութիւն կ’ունենան ծանօթանալու  Հայաստանին, հանդիպելու եւ կապեր ստեղծելու իրարու հետ:

Շնորհակալութիւն յայտնելով հիւրին նախարարութեան աշխատանքները բարձր գնահատելու համար` նախարարը փոխադարձօրէն շնորհակալութիւն յայտնեց Եզեկելեանին հայրենանուէր աշխատանքներուն եւ նախարարութեան ծրագիրներուն աջակցելուն  համար:

Զրոյցի ընթացքին շօշափուեցան նաեւ Հայաստան տեղափոխուած սուրիահայերու վիճակին վերաբերող հարցեր:

Նախարարը մանրամասնօրէն տեղեկացուց սուրիահայութեան ցուցաբերուող պետական աջակցութեան, ինչպէս  նաեւ առկայ դժուարութիւններուն մասին:

 Քննարկուեցան Հայաստան-Սփիւռք գործակցութեան զարգացման առնչուող այլ հարցեր: