Հայոց ցեղասպանության  իրողությունն ու Թուրքիայի կողմից դրա ուրացումը բարձրաձայնելու նպատակով 1983 թ. հուլիսի 27-ին Հայ հեղափոխական բանակի հինգ անդամներ`Սեդրակ Աճեմյանը, Վաչե Դաղլյանը, Արա Քերջլյանը, Սիմոն Հահնյանը եւ Սարգիս Աբրահամյանը Լիսաբոնում տեղակայված Թուրքիայի դեսպանատունը գրավելուց հետո  պայթեցրին այն եւ  փլատակների տակ ողջակեզ դարձած նահատակվեցին:

Լիսաբոնում զոհված հինգ մարտիկների հիշատակը հարգելու եւ վառ պահելու նպատակով Նոր Ջուղայի ՀՄՄ «Արարատ» միության սկաուտական միավորի գերագույն մարմնի նախաձեռնությամբ չորեքշաբթի`սեպտեմբերի 9-ի երեկոյան ժամը 8-ին միության սրահում տեղի ունեցավ  հուշ-երեկո: Այս մասին «Հայերն այսօրին» տեղեկացնում է Նոր Ջուղայի ՀՄՄ «Արարատ» միության թղթակից Երանուշ Թահմազյանը:

Միջոցառման սկզբում միավորի Արի-արենուշական հատվածի միջոցով  կատարվեց դրոշակի արարաողություն, ապա միավորի Գերագույն մարմնի խոսքը ընթերցեց  Մանիա Ղուկասյանը: Ծրագրի ընթացքում  ներկաները ունկնդրեցին  Արեգա Սիմոնյանի եւ Վանիա Պետրոսյանի կատարմամբ Ս. Կապուտիկյանի  հայրենասիրական  ստեղծագործություններից, դիտեցին  հինգ մարտիկների անձնազոհական ակտի մասին փաստա-վավերագրական տեսաժապավենը եւ Հարմա  Կարապետյանի ու Թանգիկ Միրզախանյանի կատարմամբ «Զինվորի երգը» զուգերգը:

Ներկաները վայելեցին նաեւ միավորի Գայլիկ–արծվիկների կատարմամբ  հայրենասիրական խմբերգեր: Երեկոն վարեց Վեհանուշ Խուդաբախշյանը:

 Նշելի է, որ հուլիսի 26-ից 30-ը  նույն միավորի  նախաձեռնությամբ  անցկացվեց  ամենամյա կարցով տեղի ունեցող  ֆուտբոլի 25-րդ մրցաշարը, որի մասին լուրը հաղորդելենք հաջորդիվ: