Հայոց ցեղասպանութեան  իրողութիւնն ու Թուրքիոյ կողմէ ատոր ուրացումը բարձրաձայնելու նպատակով 1983 թ. Յուլիս 27-ին Հայ յեղափոխական բանակի հինգ անդամներ`Սեդրակ Աճեմեան, Վաչէ Տաղլեան, Արա Քերճլեան, Սիմոն Հահնեան եւ Սարգիս Աբրահամեան Լիզպոնի մէջ տեղակայուած Թուրքիոյ դեսպանատունը գրաւելէ յետոյ  պայթեցուցին այն եւ  փլատակներու տակ ողջակէզ դարձած նահատակուեցան:

Լիզպոնի մէջ զոհուած հինգ մարտիկներու յիշատակը յարգելու եւ վառ պահելու նպատակով Նոր Ջուղայի ՀՄՄ «Արարատ» միութեան սկաուտական միաւորի գերագոյն մարմնի նախաձեռնութեամբ չորեքշաբթի` Սեպտեմբեր 9-ի երեկոյեան ժամը 8-ին միութեան սրահին մէջ տեղի ունեցաւ  յուշ-երեկոյ: Այս մասին «Հայերն այսօրին» կը տեղեկացնէ Նոր Ջուղայի ՀՄՄ «Արարատ» միութեան թղթակից Երանուշ Թահմազեան:

Ձեռնարկին սկիզբը միաւորի Արի-արենուշական հատուածի միջոցով  կատարուեցաւ դրօշակի արարողութիւն, ապա միաւորի Գերագոյն մարմնի խօսքը ընթերցեց  Մանիա Ղուկասեան: Ծրագիրի ընթացքին  ներկաները ունկնդրեցին  Արեգա Սիմոնեանի եւ Վանիա Պետրոսեանի կատարմամբ Ս. Կապուտիկեանի  հայրենասիրական  ստեղծագործութիւններէն, դիտեցին  հինգ մարտիկներու անձնազոհական գործողութեան մասին փաստա-վաւերագրական տեսաժապաւէնը եւ Հարմա  Կարապետեանի ու Թանգիկ Միրզախանեանի կատարմամբ «Զինուորի երգը» զուգերգը:

Ներկաները վայելեցին նաեւ միաւորի Գայլիկ–արծուիկներու կատարմամբ  հայրենասիրական խմբերգներ: Երեկոն վարեց Վեհանոյշ Խուդաբախշեան:

 Նշելի է, որ Յուլիս 26-30ին  նոյն միաւորի  նախաձեռնութեամբ  իրականացուեցաւ  ամենամեայ կարցով տեղի ունեցող  ֆութպոլի 25-րդ մրցաշարը, որուն մասին լուրը կը հաղորդենք յաջորդիւ: