Հայաստանի և Իրանի միջև հարաբերություններն ունեն հազարավոր տարիների պատմություն։ Մարաստանի կայսրության փլուզումից ի վեր երկու երկրնըրի ժողովուրդների միջև հաստատվել են մշակութային և պատմական կապեր։ Հայաստանն անկախացումից հետո բարիդրացիական հարաբերություններ է հաստատել Իրանի Իսլամական Հանրապետության հետ։ Ունենալով փակ սահման Թուրքիայի և Ադրբեջանի հետ՝ Հայաստանի Հանրապետությունը մեծապես կարևորում է կապը Իրանի հետ և վերջինիս համարում է իր ռազմավարական դաշնակիցը։

Հայաստանի անկախացումից հետո Իրանի հետ աստիճանաբար սկսեցին հաստատվել սերտ, բարիդրացիական հարաբերություններ բոլոր բնագավառներում:Արդյունավետ համագործակցություն ծավալվեց էներգետիկայի, տրանսպորտի, բնապահպանության, առողջապահության, գյուղատնտեսության, գիտության, կրթության, մշակույթի բնագավառներում, ինչպես նաև միջմարզային գործակցության ոլորտում: Սկսեցին կյանքի կոչվել ռազմավարական բնույթի նախագծեր:

Այս կապերը սերտանում են տարեցտարի մշակույթի,գիտության կրթության,արդյունաբերության և այլ ոլորտներում: Գրեթե ամեն տարի Հայաստանում Իրանի Իսլամական Հանրապետության դեսպանատան մշակույթի կենտրոնի և մի շարք մտավորականների,գրողների, լրագրողների կողմից հայերենից պարսկերեն և պարսկերենից հայերեն են թարգմանվում ինչպես պարսիկ, այնպես էլ հայ մի շարք հեղինակների գիտական աշխատություններ`նպաստելով երկու երկրների մշակութային կապերի սերտացմանն ու ամրապնդմանը:

Եվ ահա մի շատ հետաքրքիր ու յուրահատուկ միջոցառում էր կազմակերպվել հուլիսի 18-­ին  Հայաստանի Հանրապետության Արարատի մարզի Դվին քաղաքում:Առաջին անգամ կազմակերպվեց  Դվինի առաջին փառատոնը:

Փառատոնի հիմնական կազմակերպիչներն էին Հայաստանում  Իրանի Իսլամական Հանրապետության դեսպանատան մշակույթի կենտրոնն ու  Դվինի գյուղապետարանը:

Բացման խոսքով հանդես եկավ գյուղապետ Արծրուն Աբրահամյանը, ով իր խոսքում նշեց, որ իրենք նպատակ ունեն այս փառատոնը դարձնել ամենամյա, որպեսզի այս տոնական օրը դվինցիները կարողանան համախմբվել, ուրախանալ:

Միջոցառմանը ներկա էր ՀՀ­-ում ԻԻՀ արտակարգ եւ լիազոր դեսպան Մոհամադ Ռեիսին, ով փոռատոնի հյուրերին , ներկաներին եւ դվինցիներին դիմելով ասաց. «Ուրախ եմ, որ հնարավորություն ունեմ այսօր գտնվելու Դվինում, մեր բարեկամությունն արդեն երկու տարվա վաղեմություն ունի: Այս ընթացքում բազմիցս ենք այցելել համայնք, մոտիկից ծանոթացել գյուղի առօրյային»:Դեսպանը տեղեկացրեց նաեւ, որ փառատոնի օրը պատահական չի ընտրվել, այն համընկել է պարսկական Էյդեֆեթ տոնի հետ, որը Ռամազան ամսի վերջին օրն է: «Յուրաքանչյուր ազգ հարատեւ է իր մշակույթով, եւ ուժեղ` իր կրոնով: Հայերը եւ պարսիկներն աշխարհի հնագույն ազգերից են:

Հյուրերը, շրջելով մշակույթի տան հարակից տարածքում, մասնակցեցին ցուցահանդես-վաճառքին, որտեղ ներկայացված էր գյուղացիների արտադրանքը, հայկական ասեղնագործությունների եւ տարազների նմուշներ, գեղանկարչություն, կավե աշխատանքներ, իրանական սպասք:

Մշակույթի տան հարակից տարածքը շրջելուց հետո , հյուրերի ներկայությամբ  Դվին գյուղի մշակույթի տան տարածքում  բացվեց Իրան­-Հայաստան բարեկամության կենտրոնը, որտեղ այս պահին դեռեւս կատարվում են վերջին հարդարման աշխատանքները:

Փառատոնին իրենց գեղեցիկ կատարումներով ելույթ ունեցան «Նուբար»  հայ ավանդական երգի պարի խումբը ,   մայրաքաղաքից եւ  մարզի տարբեր տարածաշրջաններից ժամանած պարային եւ երաժշտական խմբեր, անհատ կատարողներ, աթլետներ:

«Տերյան» մշակութային կենտրոնի անդամները ներկայացրեցին հայկական տարազի նմուշներ, որոնք կարելի է կրել նաեւ առօրյայում, ասեղնագործ աշխատանքներ, ինչպես նաեւ տարազի պատմությունը: Մարզպետ Ռուբիկ Աբրահամյանը բարձր գնահատեց ԻԻՀ դեսպանատան մշակույթի կենտրոնի եւ Դվինի գյուղապետարանի համագործակցությունը, ավելացնելով, որ բանակցությունների փուլում է ԻԻՀ Իսպահանի նահանգապետի հետ հանդիպումը, որը կայանալուց հետո կունենան արդյունավետ համագործակցություն:

Գարիկ Ավետիսյան

Լուսանկարները տրամադրել է Հայաստանում  Իրանի Իսլամական Հանրապետության դեսպանատան մշակույթի կենտրոնը