Այս տարի «Ոսկե ծիրան» Երևանի 12-րդ միջազգային կինոփառատոնի առանցքում Հայոց ցեղասպանության թեման է, գրում է Artsakhpress-ը:

Փառատոնի շրջանակներում Եղեռնին նվիրված բազմաթիվ ծրագրեր և միջոցառումներ իրականացվեցին և դեռ շարունակվում են իրականացվել:

Կինոփառատոնի կազմակերպիչները տեղեկացնում  են, որ  այսօր, ժամը՝18:00-ին, փառատոնի հյուրերը և  գործընկերները այց կկատարեն Ցեղասպանության թանգարան, որտեղ Ավրորա Մարդիգանյանի անվան հուշամեդալով կպարգևատրվեն  ռուսաստանցի կինոքննադատ և մշակութաբան Կիրիլ Ռազլոգովը,  կինոռեժիսոր  Ռոբ Նիլսոնը, «Վիվասելի» գլխավոր տնօրեն  Ռալֆ Յիրիկյանը,   Հատուկ հանձնարարություններով դեսպան Լևոն Սարգսյանը,  Ֆրանսիայում ապրող  բարերար Ռայմոնդ Եզեգուլյանը,  հայաստանցի բարերարներ  Պավել Մարգարյանը և    Խաչիկ Մանուկյանը:

Հայաստան-Թուրքիա կինոպլատֆորմի նախագծերի զարգացման 14-րդ աշխատաժողովին ընդհանուր առմամբ   ներկայացվել էր 24 հայտ և մրցույթին մասնակցելու համար ընտրվել է 10-ը (5-ական` Թուրքիայից և Հայաստանից):

1. «Խաթուն», ռեժ. Բելգին Չենգիզ, պրոդ. Սերխան Աչար, Թուրքիա – վավերագրական
2. «Մուրատ», ռեժ. Սոնա Քոչարյան, Մարինե Քոչարյան, Հայաստան – վավերագրական
3. «Ես Նիզիբից եմ», ռեժ. Ռաֆֆի Նիզիբլյան, Հայաստան – վավերագրական
4. «ՀՈՄՖՈՒԼ», ռեժ. Գագիկ Ղազարյան, պրոդ. Էլիզաբեթ   Հանդլ, բեմադրող օպերատոր. Մահիր Յըլդիզ, Թուրքիա/Հայաստան/Ավստրիա/ԱՄՆ – վավերագրական
5. «Ան-տարածքներ», ռեժ. Չանթալ Փարթամյան, Հայաստան/Լիբանան – վավերագրական
6. «Լռություն», ռեժ./պրոդ. Դիանա Մկրտչյան, Հայաստան/Ֆրանսիա – վավերագրական
7. «Կ’աՐ», ռեժ.Սենեմ Գոկչե, Թուրքիա – կարճամետրաժ
8. «Պատահաբար», ռեժ. Ավիվա Բարխուդարյան, պրոդ. Նորիկ Քեշիշյան, Հայաստան/Գերմանիա – կարճամետրաժ
9. «Մի կաթիլ ջուր», ռեժ. Սաբրի Ումու Բոզիյլ, Թուրքիա – կարճամետրաժ
10. «Օտարում», ռեժ./պրոդ. Հաջի Օրման, Թուրքիա – կարճամետրաժ

Հայտերի հիմնական մասը համատեղ արտադրություններ են:

Հիշեցնենք, որ   Հայաստան-Թուրքիա կինոպլատֆորմն իր գործունեությունը սկսել է 2008 թվականին` «Ոսկե ծիրան» միջազգային կինոփառատոնի (Հայաստան) և «Անադոլու Քյուլթուր» կազմակերպության (Թուրքիա) համատեղ նախաձեռնությամբ: Այն կապեր է ստեղծում երկու երկրների կինոգործիչների միջև, խրախուսում և աջակցում է համատեղ կինոարտադրությունը: Կինոպլատֆորմն արդեն ֆինանսավորել է 17 կինոնախագիծ` Հայաստանից և Թուրքիայից:

Ժյուրիի որոշմամբ նախապես ընտրված տասը  նախագծերից մեկին կտրվի արտադրության աջակցության մրցանակ՝ 10 000 ԱՄՆ դոլարի չափով, որն այս  տարի կիսվել է  թուրք ռեժիսոր Սենեմ Գյոկչեի «Կար»և Մարինե և Սոնա Քոչարյանների «Մուրատ» վավերագրական ֆիլմերի հեղինակների միջև: Իսկ ժյուրիի  անդամ, «Երկիր» հեռուստատեսության լրատվական ծրագրի ղեկավար Գեղամ Մանուկյանը հայտարարել է, որ մրցանակակիր ֆիլմերը կցուցադրվեն անվճար: