Ապրիլի 28-ին Բաթումի քաղաքի Ամառային թատրոնում տեղի ունեցավ  Հայոց  ցեղասպանության 100-րդ տարելիցին նվիրված «100-ամյա վերք,100-ամյա պայքար» բեմականացումը: Այս մասին «Հայերն այսօրը» տեղեկանում է Բաթումի իր աղբյուրներից:

Միջոցառումը կազմակերպվել էր Բաթումի Սուրբ Փրկիչ եկեղեցու հոգևոր հովվության և մանկավարժական կազմի կողմից:

Թատրոնի լեփ-լեցուն  դահլիճում եկեղեցու կիրակնօրյա և շաբաթօրյա դպրոցի, «Աղբյուր»  երգչախմբի, «Հեղնար»  պարային խմբի, գեղագիտական խմբակի և երիտասարդական շարժման սաները ներկայացրեցին կենդանի երգեցողություն, Հայոց ցեղասպանության  ողբերգալի տեսարաններ,Կոմիտաս վարդապետի կյանքից դրվագներ:

Մասնակիցներին և հանդիսատեսին օրհնության խոսք ասաց Աջարիայի, Գուրիայի, Իմերեթիայի և Բաթումի Սուրբ Փրկիչ եկեղեցու հոգևոր հովիվ Տեր Արարատ քահանա Գումբալյանը: Տեր հայրը բարձր գնահատեց մանկավարժների,սաների ու մասնակիցների կատարած աշխատանքը և վստահեցրեց ,որ նախնիների հիշատակը և նահատակությունն արժևորող այս ներկայացումը դեռ երկար կմնա հանդիսատեսի հիշողության մեջ: