Հունիսի 13-ին ՀՀ սփյուռքի նախարար Հրանուշ Հակոբյանը մասնակցեց Անարատ Հղության Հայ Քույրերի միաբանության նախաձեռնությամբ և իտալահայ բարերար Ալեքո և Անի Պեզիքյան ընտանիքի միջոցներով կառուցված և կահավորված Կենտրոնի բացմանը: Երևանի Թբիլիսյան խճուղու վրա կառուցված Կենտրոնը շարունակությունն է Գյումրիում գործող «Տիրամայր Հայաստանի» կրթօջախի և նախատեսված է ծառայելու որպես կացարան ու կենտրոն այն երիտասարդ աղջիկների համար, ովքեր լինելով անապահով ընտանիքից` կուսանեն Երևանի ուսումնական հաստատություններում: Ինչպես նշեց բարերար Ալեքո Բեզիքյանը`  Կենտրոնն իր բոլոր հարմարությունները և հնարավորությունները կծառայեցնի օրինակելի քրիստոնյա և ազգային դաստիարակությամբ հայ օրիորդներ և ապագա մայրեր դաստիարակելու համար:

 Գնահատանքի խոսք ուղղելով Պեզիքյան ընտանիքին` նախարար Հրանուշ Հակոբյանն այս նախաձեռնությունը գնահատեց որպես իրական հայրենասիրության, բարեգործության և հոգևոր միասնականության հրաշալի օրինակ:

 Կենտրոնի բացմանը ներկա էին Հռոմի Պապ Ֆրանցիսկոս Առաջինի, Հայ Կաթողիկե Եկեղեցու Կաթողիկոս-պատրիարք Ներսես-Պետրոս ԺԹ-ի պատվիրակները, Հայաստանի Կաթողիկե եկեղեցու առաջնորդ Հ. Ռաֆայել արքեպիսկոպոս Մինասյանը, Հայաստանի Հանրապետությունում օտարերկրյա դեսպաններ, կրոնական, հասարակական, մշակութային գործիչներ, սփյուռքահայ բազմաթիվ հյուրեր: