«Խորեն և Շուշանիկ Ավետիսյան» դպրոցի  տնօրինություն,

սիրելի ուսուցիչներ և աշակերտներ,

հարգելի՛ հայրենակիցներ,

Հայաստանի Հանրապետության սփյուռքի նախարարության և անձամբ իմ անունից  շնորհավորում եմ ձեզ «Խորեն  և Շուշանիկ Ավետիսյան» դպրոցի ստեղծման 15-ամյա հոբելյանի առթիվ:

Այս դպրոցը կրթական, ուսումնական և դաստիարակչական աշխատանքից զատ այլ խորհուրդ  ունի. դպրոցի անվանումը արդեն իսկ ծնողասիրության դաս և օրինակ է մեր սերնդի համար:

Էդվարդ Ավետիսյանը ի հիշատակ իր ծնողների ստեղծեց մի մնայուն հուշարձան, կրթահամալիր, որը մատաղ սերնդին մատուցում է որակյալ կրթություն: Միայն հայրենիքի նկատմամբ սերը, հայրենիքին ծառայելու ձգտումը և կրթության արժեքը հասկացող հայորդին է ընդունակ նման գեղեցիկ և օգտավետ ծրագիր իրականացնել:

Պատմության հոլովույթում հայ ժողովուրդը ամենածանր պայմաններում էլ առանձնացրել և արժևորել է դպրոցի դերը՝ հասկանալով թե՛ կրթական, թե՛ գաղափարական և թե՛ ազգապահպան նպատակը:

21-րդ դարում հայը պետք է լինի կիրթ, բանիմաց, մրցունակ: Այսպիսի հայի կերտման հիմնական դարբնոցը դպրոցն է: Եվ այսօրվա դպրոցը պետք է լինի գեղեցիկ ու բազմաբովանդակ, նորագույն տեխնիկայով հագեցված: Ուրախ եմ, որ Էդվարդ Ավետիսյանի մտահաղացմամբ և հովանավորությամբ այսօր երեխաներին ենք նվիրում միջազգային չափանիշներին համապատասխան կրթահամալիր:

Վստահ եմ, որ մանկավարժական կոլեկտիվը կգործի իր բարձրության վրա ոչ միայն մարդակերտումի և հայակերտումի իր առաքելությունը իրականացնելու համար, այլև պահելու և պահպանելու այս հոյակերտ հաստատությունը:

Բարին ընդ ձեզ…

Հարգանքով՝ 

ՀՐԱՆՈՒՇ ՀԱԿՈԲՅԱՆ