«Խորէն եւ Շուշանիկ Աւետիսեան» դպրոցի  տնօրինութիւն,

սիրելի ուսուցիչներ եւ աշակերտներ,

յարգելի՛ հայրենակիցներ,

Հայաստանի Հանրապետութեան սփիւռքի նախարարութեան եւ անձամբ իմ անունէն
կը շնորհաւորեմ ձեզի «Խորէն  եւ Շուշանիկ Աւետիսեան» դպրոցի ստեղծման
15-ամեայ յոբելեանի առթիւ:

Այս դպրոցը կրթական, ուսումնական եւ դաստիարակչական աշխատանքէն զատ այլ
խորհուրդ  ունի. դպրոցի անուանումը արդէն իսկ ծնողասիրութեան դաս եւ օրինակ
է մեր սերունդին համար:

Էդուարդ Աւետիսեան ի յիշատակ իր ծնողներուն ստեղծեց  մնայուն յուշարձան մը,
կրթահամալիր, որ մատաղ սերունդին կը մատուցէ որակեալ կրթութիւն: Միայն
հայրենիքի նկատմամբ սէրը, հայրենիքին ծառայելու ձգտումը եւ կրթութեան
արժէքը հասկցող հայորդին  ընդունակ է նման գեղեցիկ եւ օգտաւէտ ծրագիր
իրականացնելու:

Պատմութեան հոլովոյթին մէջ հայ ժողովուրդը ամենածանր պայմաններուն մէջ ալ
առանձնացուցած եւ արժեւորած է դպրոցի դերը` հասկնալով թէ՛ կրթական, թէ
գաղափարակա՛ն եւ թէ՛ ազգապահպան նպատակը:

21-րդ դարուն հայը պէտք է ըլլայ կիրթ, բանիմաց, մրցունակ: Այսպիսի հայու
կերտման հիմնական դարբնոցը դպրոցն է: Եւ այսօրուան դպրոցը պէտք է ըլլայ
գեղեցիկ ու բազմաբովանդակ, նորագոյն տեխնիկայով յագեցուած: Ուրախ եմ, որ
Էդուարդ Աւետիսեանի մտայղացմամբ եւ հովանաւորութեամբ այսօր երեխաներուն կը
նուիրենք միջազգային չափանիշներուն համապատասխան կրթահամալիր:

Վստահ եմ, որ մանկավարժական անձնակազմը պիտի գործէ իր բարձրութեան վրայ ոչ
միայն մարդակերտումի եւ հայակերտումի իր առաքելութիւնը իրականացնելու
համար, այլեւ պահելու եւ պահպանելու այս հոյակերտ հաստատութիւնը:

Բարին ընդ ձեզ…

Յարգանքով`

ՀՐԱՆՈՅՇ ՅԱԿՈԲԵԱՆ