Մայիսի 25-ին Տյումենի Մեսրոպ Մաշտոցի անվան հայկական մշակույթի կենտրոնում (Տյումենի մարզի «Հայաստան» հայկական մշակութա-լուսավորչական հասարակական կազմակերպությանը կից գործող, նախագահ` Ա. Հովեյան) մեծ տոն էր։       

Դպրոցի սաները (դասվար` Ալվան Պողոսյան) ներկայացրին «Մեր դպրոցական մանկության հրաշալիքները» խորագրով գեղեցիկ միջոցառում՝ նվիրված այբբենարանի ավարտման օրվան:  

Ինչպես «Հայերն այսօր»-ին հայտնում են մշակութային կենտրոնից, աշակերտները ցուցադրեցին իրենց գիտելիքներն ու կարողությունները` մեկնաբանելով ու համեմատելով նշված յուրաքանչյուր հրաշալիք (Այբուբեն, մայրենի լեզու, մայր, գիրք, հայրենիք,  մանկություն,  դպրոց):

Նրանք մաքուր ու հստակ արտասանեցին այբուբենի տառերը, գեղեցիկ հայերենով հնչեցրին բանստեղծություններ` նվիրված մայրենի լեզվին, հայրենիքին, մայրերին, երգեցին երգեր: Վերջին` «դպրոց» բաժնում ունկնդիրներին անչափ հուզմունք պատճառեց առաջին ուսուցչին նվիրված ասմունքը, բոլորը կարծես մտովին մի պահ տեղափոխվեցին դեպի դպրոցական մանկություն: Աշակերտները իրենց խորին շնորհակալությունը հայտնեցին ուսուցիչներին և երդվեցին ի կատար ածել նրանց պատգամը:

Միջոցառման  երկրորդ մասում նախապատրաստական խմբի փոքրիկ սաները շնորհավորեցին  ավագ ընկերներին,  իրենց բացառիկ գեղեցիկ ելույթներով` երգ ու պարով, փոքրիկ բեմադրություններով …

Ուսուցչուհի Ա. Պողոսյանը ջանք ու եռանդ չէր խնայել` աշակերտների մեջ սերմանելու սեր ու հարգանք մայրենի լեզվի, հայկական մշակույթի արժեքների նկատմամբ: Միջոցառումն էլ ավելի ծաղկեցրին մշակույթի կենտրոնի պարի (գեղ. ղեկավար-Ա Խաչատրյան), դհոլահարների խմբերի (գեղ. ղեկավար – Ա. Ազրյան), դուդուկի  դասարանի սաների (գեղ. ղեկավար – Ն. Մուսոյան) կատարումները:

Միջոցառման վերջում դպրոցի տնօրեն Ռ. Դանիելյանը իր երախտիքի խոսքերով ոգևորեց բոլոր մասնակիցներին, որին հաջորդեց ամենահանդիսավոր պահը: Նա գրաճանաչ սաներին վկայականներ hանձնեց այբուբենի ավարտման կապակցությամբ, իսկ մյուսներին փոքրիկ հուշ-նվերներ` էջանշաններ` զետեղված այբուբենի տառերով, որոնք անսահման ուրախություն ու հաճույք պատճառեցին մեր հայ մանուկներին:

Ծնողների կողմից շնորհակալական խոսքով  հանդես եկավ ծնողկոմիտեի անդամ Սուսաննա  Մելքոնյանը. «Մեր երեխաներն այսօր հիացրին ամենքիս: Նրանց սահուն խոսքը, ազատ և անկաշկանդ հանդես գալը վկայեց, որ ուսուցչուհու ջանքերը իզուր չեն անցել:

Շնորհավորում ենք մեր զավակներին և մաղթում ուսումնական մեծ հաջողություններ: Անկեղծորեն  շնորհակալություն ենք  հայտնում այս գեղեցիկ միջոցառման կազմակերպիչներին, իսկ դասավանդող ուսուցիչներին` անկոտրում կամք և անսասան ոգի:  Ծնողների կողմից  խորին շնորհակալություն Սամվել և Սերգո Ստեփանյաններին, ովքեր իրենց ներդրումն  ունեցան  հայկական  այս հարմարավետ կրթօջախի ստեղծման գործում, որտեղ  մեր երեխաները այսօր մեկ առ մեկ արտաբերեցին Մեսրոպյան տառերը` սովորեցին գրել-կարդալ մեր մայրենի լեզվով, արտասանեցին ու երգեցին  միմիայն հայերենով»: