Դեկտեմբեր 16ին, Երկուշաբթի ժամը 17.30ին, փարիզեան արուարձաններէն Կոնէսի (Վալ տ՚Ուազի նահանգ) մէջ հանդիսաւոր բացման եւ լուսաւորման արարողութիւնը կը կատարուի Ի. դարու ցեղասպանութեանց զոհերու յուշակոթողին: Ան պիտի յաւերժացնէ յիշատակը հայ, ասորի-քաղդէացի, հրեայ նահատակներու:

«Այս յուշակոթողը Կոնէսի ֆրանքեւհայկական միութեան՝ UFAG-ի բազմամեայ ջանքերուն պտուղն է» կ՚ըսուի այս առթիւ մեր ստացած հաղորդագրութեան մէջ:

Ան բարձրացուած է Կոնէսի՝ Գերեվարութեան վերացման գաւիթին վրայ, «Ռընէ Գասէն» երկրորդական վարժարանին առջեւ:

Նոյն հաղորդագրութենէն կ՚իմանանք նաեւ, թէ Ֆիլիփ Յարութիւնեանի գլխաւորութեամբ աշխատանքի խմբակ մը ստեղծուած է, որպէս առաքելութիւն ունենալով Հայոց եւ Ասորի-Քաղդէացիներու ցեղասպանութեան ճանաչումի դիմումի մը մշակումը, շիրմազուրկ նահատակներու յիշատակին յուշակոթողներ բարձրացնելու առաջարկով:

Այդ դիմումը ներկայացուած է Կոնէսի, Արնուվիլի, Սարսէլի եւ Սանուայի թաղապետական խորհուրդներուն եւ ընդունուած է: Սակայն կարելի չէ եղած ներկայացնել Կուսէնվիլի, Կարժ-լէ-Կոնէսի եւ Վիլիէ-լը-Պէլի թաղապետական խորհուրդներուն, «ծագումով թուրք ֆրանսացի» ընտրեալներուն ցուցաբերած վերապահութեան հետեւանքով:

Վալ տ՚Ուազի Ընդհանուր Խորհուրդի երկու նախագահները՝ Տիտիէ Արնալ եւ Առնօ Պազէն, գրաւոր կերպով, իրենց անձնական զօրակցութիւնը յայտնած են վերոնշեալ դիմումին:

«Նոր Յառաջ»