Սեպտեմբեր 18-20-ը Երևանում կայանալիք «Փոխադարձ վստահություն, միասնականություն և պատասխանատվություն» խորագրով Հայաստան-Սփյուռք համահայկական 6-րդ համաժողովին ընդառաջ ներկայացնում ենք «Հայերն այսօր»–ի հարցազրույցը Բեյրութի Հայկազյան համալսարանի նախագահ, վերապատվելի դոկտոր Փոլ Հայդոստյանի հետ:

– Ձեր կարծիքով ո՞րն է Հայաստան-Սփյուռք համահայկական 6-րդ համաժողովի առաջնահերթությունը:

– Հայաստան-Սփյուռք համահայկական 6-րդ համաժողովի առաջնահերթությունը նախևառաջ համախմբման և խորհրդակցության այնպիսի հարազատ մթնոլորտի ստեղծումն է, որով հնարավոր է դառնում գիտակցել, որ մեր հայրենիքի և աշխարհասփյուռ համայնքների նյութերը, հարցերը և ձգտումները փոխկապակցություն ունեցող հրատապ վիճակներ են, որոնք պահանջում են նվիրական, համակարգված կեցվածք: Այլ խոսքով՝ այսպիսի համաժողովները ոչ թե խորհրդանշական են, այլ՝ բովանդակային:

–Համաժողովի 4 թեմատիկ ուղղություններից մեկը նվիրված է հայապահպանության հիմնախնդիրներին: Ո՞րն է Սփյուռքում հայապահպանության ամենամեծ հիմնախնդիրը և ի՞նչ  պետք է անել այդ ուղղությամբ:

– Հայապահպանության ամենամեծ հիմնախնդիրը դաստիարակչական է: Դպրոցը, եկեղեցին, ընտանիքը, թաղամասը, մշակութային կամ քաղաքական կենտրոնը հաջողո՞ւմ են արդյոք դաստիարակել ինքնավստահ, մրցունակ ու մշակված հայ մարդ, թե՞ հայը հայի հետ համախմբելու նեղ հորիզոնների սահմանների մեջ  են մնում: Այս ուղղությամբ անհրաժեշտ է ինքնության և դաստիարակության նոր ուղղությամբ կատարվող աշխատանք:

–  Որո՞նք են այն կարևոր նախադրյալները, որոնց միջոցով Սփյուռքում հնարավոր է հայապահպանությանն ուղղված աշխատանքներ իրականացնել` հատկապես երիտասարդների շրջանակում:

– Հայապահպանությանն ուղղված աշխատանքների հաջողության երաշխիքները հայկական հաստատությունների թափանցիկ, արհեստավարժ, բազմալեզու և բազմամիջոց առաջնահերթությունների վրա հիմնված ռազմավարությունն է:  Ժամանակակից երիտասարդը պիտի չհրապուրվի միայն զգացականով: Կարևոր է նաև ծանոթացնել հայը հային, ներկայացնել Հայաստանի և հայի հիմնական ուժականության պատկերը, հայերի համագործակցության գործնական օրինակներ ցույց տալ, ինչպես նաև գիտական, տնտեսական, հոգեմտավոր, մշակութային, քաղաքական ոլորտներում զարգացման հորիզոններ բացել:

– Ի՞նչ ակնկալիքներ ունեք համաժողովից:

– Մեր ակնկալությունը նախ այն է, որ համաժողովի ընթացքում հարազատորեն ամրապնդվեն Սփյուռքի անձնավորությունների, սփյուռքյան կառույցների և Հայաստանի պետական և հասարակական մարմինների միջև կապերը:  Մեր երկրորդ հույսն այն է, որ մեր բոլոր խնդիրները՝ տեղական և համաշխարհային, քննարկվեն իրատեսական մոտեցումներով և գործնական առաջադրանքներով: Իսկ երրորդ ակնկալելիքն այն է, որ չպետք է ջանք խնայենք՝ հայկական համակարգված, դինամիկ տեսիլք ստեղծելու համար: