ՀՀ սփյուռքի նախարարության «Արի տուն–2017» ծրագրի առաջին փուլի մասնակից Արփինե Բակունցի ծննդավայրը  Գորիս քաղաքն է: Չորս տարի առաջ են ընտանիքով ՌԴ Կրասնոդար քաղաք տեղափոխվել, որտեղ ռուսական դպրոց է հաճախում: Հայաստանին մոտ զգալու, Մայրենին չմոռանալու համար՝ հաճախում է նաև հայակական համայնքում գործող կիրակնօրյա դպրոց:

Արփինեն շատ էր կարոտել իր Հայրենիքը, և այդ կարոտն է նրան «Արի տուն» բերել, որպեսզի այցելի բոլոր այն վայրերը, որտեղ նախկինում չի հասցրել լինել: Ի դեպ, Սփյուռքի երիտասարդների հայրենաճանաչության ծրագրին մասնակցելու է եկել ՌՀՄ Կրասնոդարի մասնաճյուղի կրթական խորհրդի ղեկավար, հայոց լեզվի ուսուցչուհի  Կարինե Եսայանի խորհրդով:

««Արի տուն» ծրագրի ամենակարևոր հանգամանքներից մեկն էլ այն է, որ աշխարհի տարբեր երկրներում ապրող հայ երիտասարդները կարողանում են միախմբվել Հայաստանում, ավելի հայրենասիրությամբ լցվել՝ չհեռանալով իրենց արմատներից»,-«Հայերն այսօր»-ի թղթակցի հետ զրույցում ասաց Արփինեն՝ ընդգծելով, որ ցանկանում է Հայաստան վերադառնալ, կրթությունը այստեղ շարունակել՝ իր հետքը հայկական հողում թողնելով:

Արդեն չորրորդ օրն է, որ Արփինեն ոգևորված «Արի տուն» ծրագրի շրջանակներում Հայաստանի գեղատեսիլ, կրթամշակութային վայրեր է մեկնում, նույնիսկ հասցրել է ընկերանալ Կանադայից, Ֆրանսիայից և Սիրիայից եկած հասակակիցների հետ:

«Անհամբերությամբ սպասում եմ հատկապես Աղավնաձորում կազմակերպվող  ճամբարային օրերին: Տեղյակ եմ, որ ծրագրի  կազմակերպիչներն ամեն ջանք գործադրել են՝ բովանդակալից, հետաքրքիր ժամանց ունենալու համար»,-զրույցն ամփոփեց Արփինե Բակունցը:

Գևորգ Չիչյան